Депутаттардың сынынан кейін "СК-Фармация" басшысы ауысты

«СК-Фармация» ЖШС басқарма төрағасы болып Нұрлыбек Асылбеков тағайындалды. Бұл жөнінде Денсаулық сақтау министрлігі хабарлады.

Ол бұл қызметке Еркен Жақатайдың орнына келді. Жақатай компанияны 2024 жылдың шілдесінен бері басқарып келді. 

Нұрлыбек Асылбеков 1966 жылдың 1 қаңтарында туған. Бұған дейін ол Астана қаласының тұтынушылар құқығын қорғау департаментінің басшысы, Фармация комитеті төрағасының орынбасары, Тауарлар мен қызметтердің сапасы мен қауіпсіздігін бақылау комитеті төрағасының орынбасары секілді лауазымдарды атқарған. Соңғы қызметі – Шымкент қалалық денсаулық сақтау басқармасының басшысы.

Компаниядағы кадрлық өзгеріс депутаттардың сынынан кейін орын алды. Мәжіліс депутаты Бақытжан Базарбек жақында Бас прокуратураға төрт арыз дайындап жатқанын мәлімдеді. Оның бірі Жоғары аудиторлық палатаның «СК-Фармация» мен ірі фармкомпанияларға жүргізген тексеріс нәтижесі бойынша әзірленген. Тексеріс кезінде кейбір дәрілердің бағасы 600%-ға дейін негізсіз көтерілгені, жалғыз жеткізушілерден күмәнді сатып алулар және дәрілерді нарыққа шығарудың тым кешіктірілуі анықталған. Жалпы қаржылық бұзушылықтар көлемі – 3,7 млрд теңге, ал бюджеттің ықтимал шығыны – 22 млрд теңгеге жуық.

Осыдан кейін «СК-Фармация» компаниясы Жоғары аудиторлық палатаның аудиті негізінде бірқатар жеткізушінің іс-әрекетіне және 2023 жылы қабылданған кейбір нормативтік құқықтық актілерге құқықтық баға беру үшін Бас прокуратураға өздері жүгінгенін хабарлады. Компания өз жұмысындағы кемшіліктерді анықтап, түзетуге ашық екенін мәлімдеді.

Бұған дейін мәжіліс депутаты Татьяна Савельева да компанияны сынға алған болатын. Оның айтуынша, «СК-Фармация» дәрілерді сатқанда 95% жағдайда ең жоғарғы үстеме бағаны (7%) қолданған. Бұл заңға қайшы, себебі бірыңғай дистрибьютор үшін үстеме баға регрессивті шкала бойынша сараланып белгіленуі тиіс. Депутаттың мәліметінше, соңғы үш жылда компания 78 млрд теңге табыс тапқан, ал шығыны 36 млрд теңге болған.

Айта кетейік, «СК-Фармация» компаниясы 2009 жылы Үкімет қаулысымен құрылған. Ол – тегін медициналық көмектің кепілдендірілген көлемі және МӘМС аясында медициналық ұйымдар үшін дәрі-дәрмек сатып алу және жеткізу жөніндегі бірыңғай оператор.