Депутаттардың нақты жалақысы мен күнделікті шығыны жайлы сұхбат берді

Парламент депутаттары Айдарбек Қожаназаров, Айтуар Қошмамбетов және Динара Наумова халық арасында жиі айтылатын «депутаттар миллиардтап табыс табады» деген мифке қатысты пікір білдірді. Халық қалаулылары өздерінің нақты жалақысы мен тұрмыстық шығындары туралы ашық сұхбат барысында қоғамдағы қалыптасқан теріс түсініктерді жоққа шығарды,деп хабарлайды Kursiv.kz

Мәжіліс депутаты Айдарбек Қожаназаров парламентке келгенге дейін бизнес саласындағы табысының қазіргі жалақысынан бес есе жоғары болғанын жеткізді. Оның сөзінше, депутаттардың қалтасына миллиардтаған қаржы түседі деген пікір шындыққа жанаспайды. Өз кезегінде Айтуар Қошмамбетов депутаттардың табысын басқа да мемлекеттік қызметкерлердің жалақы деңгейімен салыстыруға шақырды.

Бұған дейін депутат Бақытжан Базарбек өз жалақысының 900 мың теңге көлемінде екенін ашық айтқан болатын. Ол бұл соманың қалалық өмірдің талаптары мен отбасылық шығындарды толық жабуға жеткіліксіз екенін, сол себепті қосымша табыс көзін қарастыруға тура келетінін мойындады.

Динара Наумова парламенттің құрамы тек егде жастағы адамдардан тұрады деген стереотипті де жоққа шығарды. Қазіргі таңда депутаттардың орташа жасы 39 жас пен 4 айды құрайды. Айдарбек Қожаназаровтың өзі парламентке 37 жасында келгенін алға тартып, бұл ортаның жас әрі білікті мамандармен толығып жатқанын атап өтті.

Бұл сұхбат депутаттардың жұмысы туралы қоғамдағы сұрақтарға жауап беру және мемлекеттік қызметтің ішкі ахуалын ашық көрсету мақсатында ұйымдастырылды.