$ 446.56 € 512.34 ₽ 5.3

Депутаттар тағы да TikTok-қа тыйым салуды ұсынды

Редакция
19 ақпан 2025, 04:15
Депутаттар тағы да TikTok-қа тыйым салуды ұсынды Сурет авторы: kursiv.media

Мәжіліс депутаттары TikTok желісіне шектеу қою мәселесін тағы да көтерді. «AMANAT» фракциясының мүшелері Премьер-министр Олжас Бектеновке жолдаған депутаттық сауалында аталған әлеуметтік желінің балалар мен жастарға кері әсерін атап өтті.

Депутаттар TikTok-тың қазақ қоғамына теріс ықпалын, әсіресе жасөспірімдер арасында әдепсіз контенттің кең таралуын сынға алды. Олар құмар ойындар, әдепсіз челлендждер, зорлық-зомбылықты насихаттау, суицидке итермелеу және ұлттық құндылықтарға қайшы ақпараттар көп таралып жатқанын ескертті.

«Ұрпақ тәрбиесімен тікелей әлеуметтік желілер айналысып жатыр. Соның салдарынан ұлттық құндылықпен сусындамаған жас ұрпақ өсіп келеді», – делінген депутаттық сауалда.

Халық қалаулыларының айтуынша, TikTok-қа шектеу қойған елдер қатары көбейіп келеді. Ресей, Қырғызстан, Өзбекстан, Тәжікстан, Франция, Австралия, Канада, Еуропалық Одақ елдері желіге белгілі бір деңгейде шектеу енгізген. Тіпті, TikTok-тың отаны саналатын Қытайда бұл платформа қолжетімсіз.

Депутаттар Үкіметтен мына шараларды қолға алуды сұрады:

  1. TikTok-тағы әдепке, ұлттық құндылықтарға қайшы, балалардың санасын улайтын, теріс әдеттерге шақыратын контентке шектеу қою.
  2. Кәмелет жасына толмаған балалардың TikTok қолдануына шектеу енгізу немесе мүлдем тыйым салу механизмдерін қарастыру.

Бұл – Мәжілісте TikTok-қа тыйым салу мәселесінің алғаш рет көтерілуі емес. Былтыр депутат Ерлан Сайыров та платформаға шектеу қоюды ұсынған болатын. Алайда билік тарапынан ешқандай шара қабылданған жоқ.

Соңғы жаңалықтар