Депутаттар Өскемендегі «Азия Авто» зауытын қайта жандандыруды ұсынды

Мәжіліс депутаты, «Ақ жол» партиясы фракциясының мүшесі Серік Ерубаев Премьер-министр Олжас Бектеновке жолдаған депутаттық сауалында Өскемендегі «Азия Авто» зауытының өндірістік базасын тиімді пайдалану қажеттігін көтерді.

Депутаттың айтуынша, тәуелсіздік жылдарында Қазақстан автомобиль өнеркәсібін дамытуға бірнеше рет талпынғанымен, көрсетілген мемлекеттік қолдау көлеміне сай нәтиже болмаған.

Ерубаев «Азия Авто» мысалын келтіріп, бұл компания жылдар бойы салықтық жеңілдіктер, кедендік преференциялар мен индустриялық субсидиялар алып келгенін, бірақ толыққанды өндіріс пен терең өңдеу деңгейіне жете алмағанын айтты.

«Азия Авто» компаниясына компоненттерді импорттау кезінде 75 млрд. теңге, дайын өнімді өткізу кезінде 122 млрд. теңге қосымша құн салығынан, 99 млрд. теңге кеден төлемдерінен босатылды. Сонымен қатар, кәдеге жаратудан (утильсбор) 65 млрд. теңге иемденді.

«Ашық деректерге сүйенсек, компанияға берілген жеңілдіктер мен преференциялардың жалпы көлемі 361 миллиард теңгеден асқан. Соған қарамастан, жоба нақты нәтижеге жеткізбеді. Бұл – жаңа индустриялық жобаларда осындай қателіктерді болдырмау үшін өте қымбат сабақ», – деді депутат.

Сондай-ақ ол пайдаланылмай тұрған зауыт қуаттарын бос қалдырмай, «AllurAuto» (Қостанай) мен «Hyundai Trans Kazakhstan» (Алматы) секілді табысты жобаларды дамытуға бағыттауды немесе ауыл шаруашылығы мен машина жасау өндірісіне бейімдеуді ұсынды.

«Бұл тек өндірістік база мәселесі емес. Өскеменде бір кездері мыңдаған білікті маман еңбек етті. Сол кадрлардың әлеуетін қайта жандандырып, жоғары технологиялық өндірісте пайдалану қажет», – деді Ерубаев.

Депутат халықаралық тәжірибеге де тоқталып, Жапония, Оңтүстік Корея, Қытай сияқты елдер автомобиль саласын қарапайым құрастырудан бастап, кейін толыққанды өндіріс деңгейіне көтерілгенін еске салды.

«Өскемен тек шикізат өндіретін емес, дайын өнім шығаратын жаңа индустриялық орталыққа айналуы тиіс», – деп түйіндеді Серік Ерубаев.

Фракция бұл ұсынысты Үкіметтің индустриялық даму бағдарламаларына енгізу қажеттігін айтып, «Азия Авто» зауытының инфрақұрылымын сақтап қалу және оны машина жасау өндірісінде қайта пайдалану туралы бастама көтерді.