Депутаттар қазақстандық элитаның Эпштейнмен ықтимал байланыстарын тексеруді сұрады

Мәжілістегі ОСДП фракциясының депутаттары Бас прокурор мен Ұлттық қауіпсіздік комитетінің төрағасына депутаттық сауал жолдап, қазақстандық лауазымды тұлғалардың Джеффри Эпштейнмен ықтимал байланыстарын тексеруді сұрады. Бұл туралы пленарлық отырыста фракция жетекшісі Асхат Рақымжанов мәлімдеді.

Оның айтуынша, «Эпштейн файлдарында» аталған қазақстандық шенеуніктер мен олармен аффилирленген тұлғалар туралы ақпаратты, кездесулердің сипаты мен мақсатын анықтау қажет. Сондай-ақ депутат ел ішінде және шетелде қазақстандық саясаткерлердің, кәсіпкерлердің және шоу-бизнес өкілдерінің Эпштейнмен бейресми байланыстары болған-болмағанын тексеруді ұсынды.

Рақымжанов ұлттық қауіпсіздікке төнуі мүмкін қатерлерге құқықтық баға беруді сұрады. Оның ішінде лауазымды тұлғалардың беделіне нұқсан келтіру қаупі, құпия ақпараттың, соның ішінде мемлекеттік құпиялардың сыртқа шығу ықтималдығы бар.

Депутаттың сөзінше, халықаралық жарияланымдарда «Ескі Қазақстан» кезеңіндегі жоғары лауазымды тұлғалар аталады. Атап айтқанда, қазіргі таңда мемлекеттік сатқындық және билікті басып алуға әрекет жасады деген айыппен жазасын өтеп жатқан бұрынғы премьер-министр әрі ҰҚК төрағасы Кәрім Мәсімовтің есімі кемінде сегіз рет аталғаны айтылды. Сонымен қатар шетелдік БАҚ-та Эпштейннің бұрынғы Ұлттық банк төрағасы Қайрат Келімбетовпен Нью-Йоркте бірге демалғаны туралы мәліметтер жарияланғаны атап өтілді.

Бұдан бөлек, ашық құжаттарда Эпштейннің Қазақстанға бірнеше рет келгені көрсетілгені айтылды. Депутат оның сапарларының мақсаты қандай болғанын, сол кезеңдегі жоғары лауазымды тұлғалармен байланысы бар-жоғын және шешім қабылдаушы тұлғаларға сыртқы ықпал ету арналары қалыптаспағанын тексеруді ұсынды.

ОСДП фракциясы құқық қорғау және арнайы органдардан аталған мәселелер бойынша ресми тексеру жүргізіп, құқықтық баға беруді сұрады.