Үкімет дәрігерлерге күш қолданғандарды қатаң жазалау бастамасын қолдамады – Аймағамбетов

Мәжіліс депутаты Асхат Аймағамбетовтың мәлімдеуінше, Парламент үш рет медицина қызметкерлеріне жасалған зорлық-зомбылық үшін Қылмыстық кодекске қатаң жаза енгізуді ұсынған, алайда үкімет бұл бастаманы қолдамаған.

"Біз дәрігерлерге күш қолданғандарды бөлек баппен жауапкершілікке тартуды ұсындық. Бұл полицейлер мен орманшыларға (егерь) қатысты жауапкершілік үлгісіне ұқсас. Сондай-ақ, шабуыл жасаған адамдарды келтірілген моральдық және материалдық залалды өтеуге міндеттеу керек. Егер дәрігер еңбекке жарамдылығынан айырылса, қажет босла өмір бойы өтемақы төлеуі тиіс", – деді депутат бастаманың мәнін түсіндіріп.

Сонымен қатар депутаттар дәрігерлерді сақтандыру жүйесін жетілдіруді де ұсынады. Аймағамбетовтың айтуынша, жұмыс кезінде дәрігерге жасалған шабуыл немесе алған жарақаттар да сақтандыру өтемақысына енгізілуі тиіс.

"Халықаралық тәжірибе де біздің ұсынысымыз дұрыс екенін көрсетеді. Еуропа елдерінде дәрігерге шабуыл жасау полицияға шабуыл жасаумен тең. Онда мұндай әрекет үшін нақты, қатаң жаза бар. Мемлекет дәрігерді қатты қорғайды. Бізде де солай болуы керек. Осы күзде біз бұл заңдар бойынша тиімді шешім қабылданады деп сенемін", – деді Аймағамбетов.

Оның пікірінше, кәсіби сала бойынша алғанда, Қазақстанда дәрігерлер басқа мамандық өкілдеріне қарағанда агрессиямен жиі бетпе-бет келеді. Ол Қарағанды мен Қостанайда болған соңғы оқиғаларды мысал ретінде келтірді.