Депутат Үкіметтен қазақстандықтарды эвакуациялау шығындарын кім өтейтінін сұрады

Таяу Шығыстағы әскери қақтығыс кезінде Қазақстан азаматтарын елге қайтару тәжірибесін ескере отырып, сақтандыру нарығын және туристік саладағы мемлекеттік-жекеменшік әріптестіктің жаңа тетіктерін дамыту ұсынылды. Бұл туралы «Ақ жол» партиясы фракциясының депутаты Серік Ерубаев Премьер-министрдің бірінші орынбасары Роман Склярдың атына жолдаған депутаттық сауалында айтты. 

Депутаттың айтуынша, Таяу Шығыстағы жағдай ушығып, азаматтық әуе қатынасы шектелген кезде Қазақстан азаматтарын эвакуациялау мемлекет пен бизнестің үйлесімді әрекетінің арқасында жүзеге асырылып жатыр. Президент Қасым-Жомарт Тоқаев Қауіпсіздік кеңесінің отырысында тиісті тапсырма бергені де атап өтілді. 

«Туристік Қамқор» қорының дерегіне сәйкес, әскери қақтығыс басталған кезде Біріккен Араб Әмірліктерінде шамамен 3 мың, Қатарда 1 мыңнан астам, ал Мекке мен Мединада 200-ге жуық қазақстандық турист болған. Сонымен қатар бұл өңірлерде тұрақты тұратын азаматтар мен студенттер де бар. Қазіргі мәлімет бойынша, 946 қазақстандық елге оралған. 

Депутат соғыс жағдайында эвакуацияның қаржыландыру көзі нақты айқындалмағанын атап өтті. Оның сөзінше, әуе кеңістігі жабылған кезеңде кейбір әуежайлар арқылы ұшатын коммерциялық рейстердің бағасы күрт өсіп, жүздеген мың долларға дейін жеткен. 

Серік Ерубаев Үкіметке бірнеше мәселе бойынша түсініктеме беруді сұрады. Атап айтқанда, эвакуациялық рейстер кезінде авиакомпаниялардың шығындарын мемлекет өтей ме, әлде барлық шығын тасымалдаушылардың өз қаражаты есебінен жүзеге асырыла ма деген сұрақ көтерілді. 

Сонымен қатар депутат қарулы қақтығыстар мен әуе қатынасы тоқтаған жағдайда қазақстандықтарды жаппай эвакуациялау үшін мемлекет пен бизнес арасындағы қаржылық және құқықтық тетіктер бар ма екенін нақтылауды талап етті. 

Оның пікірінше, мұндай жағдайларда азаматтарды қорғау үшін сақтандыру нарығын дамыту және мемлекеттік-жекеменшік әріптестіктің жаңа моделін қалыптастыру қажет. Бұл ұсыныстар Мемлекет басшысының сақтандыру өнімдерін кеңейту және мемлекеттік-жекеменшік әріптестікті дамыту жөніндегі тапсырмаларына сәйкес жүзеге асырылуы тиіс. 

Депутаттың айтуынша, қазіргі геосаяси жағдайды ескерсек, болашақта осындай төтенше жағдайлар қайталануы мүмкін. Сондықтан мемлекет пен бизнес арасындағы өзара іс-қимылдың қосымша тетіктерін алдын ала әзірлеу маңызды.