Депутат шетел агенттері туралы заң қабылдауды ұсынды

Мәжілістің пленарлық отырысында «Қазақстанның Халық партиясы» фракциясының депутаты Ирина Смирнова Қазақстанның ұлттық мүдделерін қорғау үшін шетелдік ұйымдардың қызметін реттейтін заң қабылдауды ұсынды. Ол бұл ұсынысты Премьер-Министр Олжас Бектеновке жолдады.

«Қазақстанда кез келген шетелдік құрылымның қызметін ашық көрсету үшін «шетел агенттері» туралы заң қажет. Мұндай заң азаматтарға ақпарат көздерін саралап, бағалауға мүмкіндік береді. Алайда гуманитарлық және ғылыми ұйымдарға қатысты ерекше жағдайлар қарастырылуы керек», – деді депутат.

Смирнованың айтуынша, АҚШ, Ұлыбритания, Франция, Қытай, Израиль және Австралия сияқты елдерде осындай заңдар бар. Ол сондай-ақ Қазақстанда шамамен 200 шетелдік қаржыландыратын үкіметтік емес ұйымдар жұмыс істейтінін, олардың 70%-ы АҚШ көздерінен қаржы алатынын атап өтті. Депутат шетелдік ұйымдардың қызметін қайта қарау елдің егемендігін нығайтуға көмектеседі деп санайды.