$ 502.57 € 591.68 ₽ 6.42

Депутат Назарбаевтың шетелге шығуын шектеуді ұсынды

Абдрахманов Мағжан
29 желтоқсан 2025, 10:30
Депутат Назарбаевтың шетелге шығуын шектеуді ұсынды Сурет авторы: АР

Қазақстанның тұңғыш президенті Нұрсұлтан Назарбаевтың Ресей президенті Владимир Путинмен Мәскеуде өткен кездесуі қоғам назарын аударды. Осы жағдайға байланысты Мәжіліс депутаты Ермұрат Бапи әлеуметтік желідегі жазбасында қатаң пікір білдіріп, экс-президенттің шетелге сапарын жеке мүддемен байланыстырды әрі ел қауіпсіздігіне қатысты сауал көтерді.

"Бұл не қылған сүмеңдеген жүріс?! Кезінде жеке өзі билеп-төстеп, бір шыбықпен айдаған халқы пана болмайтынын сезген сорақының қорлығы ғана ма? Әлбетте бұл тіленшектік Қазақстанға, қазаққа қарайлас қарекет емес, әдеттегідей тойымсыз жеке бастың қамы болса керек!" – деп жазды депутат.

Депутаттың айтуынша, мемлекеттік құпияға қанық тұлғалардың – экс-президенттер, министрлер немесе өзге де лауазымды адамдардың шет елге шығуын заңнамалық тұрғыда реттеу қажет болуы мүмкін. Ол мұндай шектеулердің Қазақстанның халықаралық міндеттемелері мен мемлекетаралық келісімдеріне қаншалықты сәйкес келетініне назар аударып, заңгер әріптестеріне сұрақ жолдаған.

Сонымен қатар Ермұрат Бапи ел қауіпсіздігін ескере отырып, жекелеген тұлғаларға алдын ала шекаралық «қызыл жалауша» қою тетігін енгізу мүмкіндігін талқылауды ұсынған. Депутат бұл қадамның Кремль тарапынан қалай қабылданатыны белгісіз екенін атап өтіп, экс-президенттің әрекетін Қазақстанның мемлекеттік билігі мен халқына саяси қысым ретінде бағалауға бола ма деген мәселені көтерді.

"Бұл қабылдаудың саяси мазмұнын Кремль қалай қабылдайтынын қайдам, ал экс-президенттің ішіндегі "қызыл иті" елдің мемлекеттік билігі мен Қазақстан халқына сес көрсетуі деп түсінеміз бе?" – деді Бапи.

Айта кетейік, Назарбаевтың Мәскеуге сапары мен Путинмен кездесуі туралы ресми ақпаратта келіссөздердің мазмұны ашып көрсетілмеген.

#Нұрсұлтан Назарбаев #Владимир Путин #Экс-президент #Шетел

Соңғы жаңалықтар