Депутат Нартай Аралбайұлы «пранк» жасап жүрген блогерлерді жауапқа тартуды ұсынды

Депутаттың айтуынша, соңғы уақытта әлеуметтік желіде «күлкі үшін кез келген шектен шығуға дайын» блогерлер көбейген. «Адамды қорқытып, қоғамдық орында ақымақтық жасауды қызық көріп, парақшасындағы лүпіл санын арттырғанымен, парасат биігінен омақаса құлағандар қаптап кетті», — деді ол.

Мәжілісмен нақты мысалдар келтірді:
– Астанада блогерлер лифт ішінде «жалған мәйіт» кіргізіп, адамдарды әдейі шошытқан;
– тағы бірі тапанша ұстап, жұрттың зәре-құтын алған;
– ал Алматыда пранкерлер аула сыпырушыларды мазақ етіп бейнежазба түсірген.

Сондай-ақ, депутат шетелде де отандық блогерлердің ел имиджіне нұқсан келтіріп жүргенін айтты. «Қытайда “ұрлық жасап жатқандай” видео түсірген Аружан Айбекова кейін Ташкентте де оғаш пранк жасап, қайта шу тудырды. Бұл – ойын емес, қоғамға қауіп төндіретін әрекет», — деді ол.

Аралбайұлы жасанды интеллект көмегімен жасалатын пранктердің де көбейіп бара жатқанына назар аударды. Оның айтуынша, мұндай контент адамдарды шатастырып, жалған ақпарат тарату қаупін күшейтеді.

«Бір блогер тірідей табытқа жатып, “24 сағат табытта” атты челлендж бастаған. Бұл — адам психикасына әсер ететін, моральдық шектен асқан әрекет», — деді депутат.

Осыған байланысты ол бірнеше ұсыныс айтты:

1. Қоғамдық тәртіпті бұзып, жеке өмірге қол сұққан пранкерлердің бірыңғай тізімін жасап, жариялау;

2. Мұндай контент таратқан аккаунттарды дереу бұғаттау;

3. Әлеуметтік желі әкімшілерінен қауіпті пранктер туралы уәкілетті органдарға хабар беруді талап ету;

4. Қоғамға әсері бар түсіндіру жұмыстарын жүйелі жүргізу.

Аралбайұлы сөз соңында: «Абай айтқандай, күлудің де, көңіл көтерудің де өлшемі бар. Сол өлшемнен асқандарды заңмен тұсайтын кез келді», — деп түйіндеді.