Депутат көпбалалы аналарға берілетін жәрдемақы мөлшерін көбейтуді ұсынды

«Қазақстан Халық партиясы» фракциясының депутаттары Премьер-Министр Олжас Бектеновке жолдаған депутаттық сауалында көпбалалы аналарға берілетін жәрдемақы мөлшерін көбейтуді ұсынды. 

Елде 583 мыңнан астам көпбалалы отбасы бар, олардың 90%-ы 4 немесе 5 бала тәрбиелеп отыр. Депутаттардың айтуынша, көпбалалы аналардың мәртебесі жеткілікті дәрежеде мойындалмай келеді. Мәселен, үлкен балалары 18 жасқа толған соң, көпбалалы отбасылар мемлекет беретін жәрдемақы мен көмектен айырылады, ал көпбалалы аналардың мәртебесі тіпті ескерілмеген.

Депутаттар көпбалалы аналарға арналған мемлекеттік наградалар мен жеңілдіктерді қайтадан қарастыру керек деп санайды. Атап айтқанда, төрт және бес баласы бар аналарға «Қола алқа» наградасын беру, сонымен қатар «Алтын алқа» мен «Күміс алқа» алқаларын рәсімдеуді жеңілдету ұсынды. Сондай-ақ депутаттар «алты бала туған және тәрбиелеп өсiрген аналар алтыншы баласы бiр жасқа жеткен және басқа балалары тiрi болған ретте наградталады» деген шартты алып тастауды талап етті. Бұдан бөлек, осы наградаларға тағайындалған жәрдемақы мөлшерін арттыру қажет деп айтты. 

"Қазіргі уақытта «Алтын алқа» және «Күміс алқа» ордендері үшін жәрдемақы мөлшері тіпті күлкілі: жеті бала үшін – 27 321 теңге, ал  алты бала үшін 23 629 құрайды. Осы орайда, Үкімет тарапынан жоғарыда аталған проблемалық сұрақтар бойынша және былтырғы жарияланған депутаттық сауалға толыққанды, барлық талап бойынша жауап беруді сұраймыз", – делінген сауалда.