Депутат Базарбек 900 мың теңге жалақы жетпейтінін айтты

Мәжіліс депутаты Бақытжан Базарбек ай сайынғы 900 мың теңге шамасындағы жалақысы отбасылық шығындарын толық жабуға жеткіліксіз екенін мәлімдеді. Ол бұл туралы Үкімет кулуарында айтты.

Депутаттың айтуынша, балаларды балабақшаға немесе қосымша үйірмелерге беру, киіндіру және өзге де қажеттіліктерге айтарлықтай қаражат жұмсалады.

«Баланың шығынына шамамен 300 мың теңге кетеді. Ал азық-түлік бағасының өсуін ескерсек, миллион теңгенің өзі жетпеуі мүмкін», – деді ол.

Базарбек өзінің табысы шамамен 900 мың теңге екенін айтып, бұл қаражаттың өзіне де жеткіліксіз екенін жеткізді. Осыған байланысты ол жұбайының да жұмыс істеуін сұрағанын атап өтті.

Сондай-ақ депутат жалақыны арттыру немесе оған қойылған мораторийді алып тастау мәселесіне қатысты пікір білдірді. Оның айтуынша, мұндай шешімдерді өзі қабылдамайды, алайда қазіргі экономикалық жағдайда жалақыны көтеру орынды емес болуы мүмкін.

Мәжілісменнің пікірінше, алдағы бес жылда бұл мәселе қайта қаралмауы ықтимал.