Депутат: балаларға әлеуметтік желілерге кіруді 14 жасқа дейін шектеу керек

Ұлттық құрылтай барысында Парламент Мәжілісінің депутаты Сергей Пономарев жастардың интернетке шамадан тыс әуестігі клиптік ойлаудың қалыптасуына себеп болып, үстірт пайым, негізсіз сын және бәрін терістеуге бейімділікті күшейтіп отырғанын айтты.

Оның айтуынша, зумерлер мен альфа буыны арасында бетпе-бет қарым-қатынас азайып, ақпаратты тексермей, жедел жауап қату әдетке айналған. Бұл үрдіс жастардың шынайы өмірден алыстауына әсер етеді.

Депутат әлеуметтік желілердің бүгінде тек байланыс алаңы емес, қоғамдық-саяси ықпал етудің қуатты құралына айналғанын атап өтті. Кейбір мемлекеттерде наразылық науқандары мен саяси үдерістердің онлайн платформалар арқылы ұйымдастырылып, бағытталғанын мысалға келтірді.

Осы орайда ол Жасанды интеллект және цифрлық даму министрлігі тарапынан бұл мәселені кешенді түрде зерделеп, нақты шешімдер әзірлеуді ұсынды. Атап айтқанда, балалар мен жасөспірімдерді қорғау, цифрлық платформалардың жауапкершілігін күшейту және зиянды ақпараттық ықпалға қарсы тетіктерді жетілдіру қажеттігін айтты.

Сонымен бірге депутат халықаралық тәжірибеге назар аударып, кей елдерде әлеуметтік желілерге қолжетімділік 14 жасқа дейін, тіпті 16 жасқа дейін шектелетінін еске салды. Оның сөзінше, мұндағы мақсат – шектеу қою емес, ойлау қабілетін, талдау мәдениетін және тірі диалогты сақтау.

Айта кетейік, бұған дейін Мәдениет және ақпарат министрлігі онлайн платформаларды Қазақстан аумағында өкілдік ашуға міндеттейтін, заңсыз контентті жоюды талап ететін және 16 жасқа дейінгі пайдаланушыларға аккаунт ашуға шектеу қоятын заңнамалық өзгерістерді әзірлеген болатын.