Депутат балалар лагерьлерінің сапасы мен қауіпсіздігін сынға алды

Мәжіліс депутаты Темір Қырықбаев Қазақстандағы балалар жазғы лагерьлеріндегі қауіпсіздік пен қызмет сапасына қатысты мәселе көтерді. Ол Аида Балаеваға жолдаған депутаттық сауалында саладағы жүйелі проблемаларды атап өтті.

Депутаттың айтуынша, жыл сайын мыңдаған бала жазғы лагерьлерде демалады. Сондықтан мұндай орындарда қауіпсіздік толық қамтамасыз етіліп, балалардың жан-жақты дамуына жағдай жасалуы тиіс. Алайда соңғы жылдары бірқатар лагерьде талаптардың сақталмауына қатысты даулы жағдайлар тіркелген.

Мәселен, Алматыдағы «Арман дала» лагерінде балалар сауна мен мейрамхана жұмыс істеп тұрған аумақта орналасып, еденде ұйықтауға мәжбүр болғаны, ал ұлдар мен қыздар бір бөлмеде орналастырылғаны айтылды. Маңғыстау облысындағы «Айналайын» лагерінде орын жетіспеушілігі салдарынан балалар екі адамнан бір төсекте немесе еденде жатқан. Түркістан облысындағы «Арман» лагерінен 400 бала ата-аналардың шағымынан кейін мерзімінен бұрын қайтарылған. Ал Шымкенттегі «Үш бұлақ» лагерінде белгіленген сыйымдылық нормасы асыра орындалған.

Қырықбаев бұл фактілер балалар демалысын ұйымдастыру саласында жүйелі проблемалардың бар екенін көрсететінін атап өтті. Оның сөзінше, AMANAT партиясының сайлауалды бағдарламасында бұл бағыт негізгі басымдықтардың бірі ретінде белгіленген. Осыған байланысты депутаттар балалар лагерьлерін лицензиялау бойынша түзетулерді қолдап, 2026 жылғы 1 сәуірден бастап лицензиялау енгізілген.

Депутат Үкіметтен лицензия алған және қызмет көрсетуге дайын білім беру-сауықтыру ұйымдары туралы нақты ақпарат беруді сұрады. Сонымен қатар мектеп жанындағы лагерьлерді есептемегенде, өңірлердің балалар демалысы орындарымен қамтылуына талдау жүргізуді талап етті.

Сауалда балалардың қауіпсіздігін арттыру үшін бірқатар ұсыныс айтылған. Атап айтқанда, лицензиялауға жатпайтын лагерьлерге тәуелсіз мониторинг енгізу, бақылаушы органдар мен лагерь иелерінің жеке жауапкершілігін күшейту, сондай-ақ бюджет қаражатының жұмсалуын ашық ету қажеттігі көрсетілген.

Депутаттың пікірінше, балалар лагері тек демалыс орны емес, олардың тұлғалық дамуына ықпал ететін маңызды орта. Сондықтан бұл салада сапа мен қауіпсіздік талаптары қатаң сақталуы тиіс.