Депутат: 2045 жылға қарай Үкіметтің жартысы жасанды интеллектке ауысуы тиіс

Мәжіліс депутаты Бақытжан Базарбек мемлекеттік аппаратты оңтайландыру және жасанды интеллектке көшу мәселесі туралы пікір білдірді. Оның айтуынша, Қазақстан 2045 жылға дейін Үкімет пен Парламенттің тең жартысын цифрлық жүйеге көшіруі қажет.

«Әр министрдің кемінде бес-алты орынбасары бар. Төрт орынбасарды қысқартып, екі ғана орынбасар қалдыру керек. Басқаша айтқанда, шығынды азайтып, біртіндеп жасанды интеллект пен цифрландыруға көшуіміз қажет», – деді депутат журналистерге берген жауабында.

Оның айтуынша, 2030 жылға дейін мемлекеттік аппаратты 20–30%-ға қысқарту керек. Депутат бұл қысқартудан кейін азаматтар жұмыссыз қалмайтынына сенімді. Базарбектің пікірінше, оларды өзге салаларға қайта оқытып, даярлау қажет.

«Биыл – жұмысшы мамандықтар жылы. Бізде сұранысқа ие мамандықтар көп. Жұмыссыздықтан қорықпауымыз керек», – деді Базарбек.

Ол тіпті қолында тетік болса, 2040 жылы Үкіметтің жартысын жасанды интеллектке ауыстыруға күш салуға дайын екенін айтты. Оның пікірінше, цифрлық технологиялар мен жасанды интеллект мемлекеттік қызметтің көптеген функциясын атқара алады.

«Мемлекеттік қызметшілердің атқаратын қызметін жасанды интеллект, цифрлық платформалар атқара алады. Жасанды интеллекттің әйелі жоқ, жылап отырған бала-шағасы жоқ. Сондықтан біртіндеп соған ауысуымыз керек. 2045 жылы үкіметтің тең жартысы жасанды интеллекттен тұруы тиіс», – деді депутат.

Сонымен қатар ол әкімдіктер, ұлттық компаниялар мен орталық аппараттарды қаржыландыруға кететін шығынды тиімсіз деп санайды. Оның пікірінше, осы функциялардың көбін цифрлық платформалар атқара алады.