Денсаулық сақтау министрлігі еліміздің үздік перзентханалары мен балалар ауруханаларын анықтады

Медицина қызметкерлері күні қарсаңында ҚР Денсаулық сақтау министрлігі ана мен бала денсаулығын қорғау саласында жоғары көрсеткіштерге қол жеткізген үздік медициналық мекемелерді марапаттады.

Ведомство мәліметінше, ана мен баланы қорғау қызметін дамыту – мемлекеттік денсаулық сақтау саясатының басым бағыттарының бірі. Байқау қорытындысы бойынша сапалы медициналық көмек көрсетіп, заманауи технологияларды енгізген және пациенттердің қауіпсіздігін қамтамасыз еткен мекемелер үздік деп танылды.

«Беделді перзентхана» аталымы бойынша жеңімпаз атанғандар:

Астана қаласының №2 көпбейінді қалалық ауруханасы – елордадағы жоғары технологиялық көмек көрсететін ірі перинаталдық орталықтардың бірі.

Түркістан облыстық №1 перинаталдық орталығы – өңірдегі күрделі жағдайларда мамандандырылған көмек көрсететін жетекші мекеме.

Қызылорда облыстық перинаталдық орталығы – жүктілікті басқару мен нәрестелерді күтуде жаңа әдістемелерді белсенді қолданатын орталық.

«Беделді балалар ауруханасы» аталымының жеңімпаздары:

Түркістан облыстық балалар ауруханасы – өңірдегі ірі педиатриялық орталықтардың бірі.

Алматы қалалық №2 балалар клиникалық ауруханасы – еліміздегі медициналық бағыттардың кең спектрі бойынша көмек көрсететін жетекші стационарлардың бірі.

Астана қалалық №3 көпбейінді балалар ауруханасы – елордадағы диагностика, емдеу және оңалтудың заманауи әдістерін енгізген негізгі орталық.

Денсаулық сақтау министрі Ақмарал Әлназарова бұл жетістіктердің артында медицина қызметкерлерінің жоғары кәсібилігі мен денсаулық сақтау жүйесін үнемі жетілдіру жұмыстары тұрғанын атап өтті. Марапаттау рәсімі кәсіби мереке аясында өткен салтанатты жиынның маңызды бөлігіне айналды.