Денсаулық сақтау министрлігі 2027 жылға қарай стационарлық емдеуге жатқызу көрсеткішін 20%-ға төмендетуді жоспарлап отыр

Қазақстан Республикасының Денсаулық сақтау министрлігі 2027 жылға қарай стационарлық емдеуге жатқызу деңгейін 20%-ға қысқартуды көздейді. Бұл бастама алғашқы медициналық-санитарлық көмек (АМСК) көрсету жүйесін жетілдіруге және ауруларды ерте диагностикалауға бағытталған. Аталған міндеттер туралы Астана қаласында өткен халықаралық конференция барысында ведомство басшысы Ақмарал Әлназарова мәлімдеді.

«2027 жылға қарай медициналық учаскелерді жалпы тәжірибелі дәрігерлермен 100% қамтамасыз ету, сондай-ақ созылмалы аурулардың асқынуына байланысты стационарға жоспарсыз жатқызу жағдайларын кемінде 20%-ға азайту межеленген», – деді министр.

Министр еліміздің медицинада отбасылық-дәрігерлік тәжірибеге көшу процесін жалғастырып жатқанын атап өтті. Қазіргі таңда республика бойынша учаскелердің 80%-дан астамы жалпы тәжірибелі дәрігерлермен қамтылған.

2026 жылдан бастап скринингтік зерттеулер кепілдік берілген тегін медициналық көмек пакетіне толықтай енгізілді. Ағымдағы жылдың бірінші тоқсанының қорытындысы бойынша артериялық гипертензияны анықтау көрсеткіші 13%-ға, ал II типті қант диабетін ерте анықтау көрсеткіші 26%-ға өсті. Сондай-ақ, жаңа басқарушылық шешімдердің нәтижесінде медициналық қызметкерлердің жүктемесі 40%-ға төмендеп, дәрігерлердің пациенттермен тікелей жұмыс істеуіне мүмкіндік артты.

Конференция аясында медициналық кадрлармен қамтамасыз ету мәселесі және алғашқы буындағы орта медицина қызметкерлерінің рөлін кеңейту шаралары талқыланды. Бағдарламаның практикалық бөлімінде ересектерге, балаларға және жүкті әйелдерге базалық жүрек-өкпе реанимациясын жасау бойынша шеберлік сабақтары ұйымдастырылып, мамандардың шұғыл медициналық көмек көрсету дағдылары пысықталды.

Бұған дейін «СУР 2.0» ақпараттық жүйесі арқылы өткізілген талдау нәтижесінде медициналық мекемелердегі кадрлық тапшылық анықталған болатын. Осыған байланысты, Денсаулық сақтау министрлігі ауруханалардың кадрлық қамтамасыз етілуін ауқымды тексеруден өткізуді қолға алды. Аймақтарға бір ай мерзім ішінде кадрлық деректер базасын өзектендіру жөнінде тапсырма берілді.