$ 447.85 € 513.46 ₽ 5.31

Денсаулық сақтау министрі саладағы былықты жайып салды

Редакция
31 наурыз 2024, 05:24
Денсаулық сақтау министрі саладағы былықты жайып салды Сурет авторы: Парламент сенатының баспасөз қызметі

Денсаулық сақтау министрі Ақмарал Әлназарова саладағы Антикордың талдауымен расталған біраз былықтың басын ашты.

Министрдің айтуынша, 1,3 млрд теңгеге дәрілік заттар сатып алынып, қолданылмаған. Бұл тек 24 медициналық ұйымда жүргізілген тексеріс нәтижесі, тиісінше ауқымы бұдан да кең.

"Жамбыл облысында қалалық көпбейінді ауруханада 758,1 млн теңге қаражатты жымқыру фактісі анықталған. "СҚ-Фармация" алдында дәрілік заттар үшін төлеуге арналған қаражат орындалған жұмыстардың актілерінсіз заңды тұлғаға аударылған", - деді министр Мәжілісте өткен комитет отырысында.

Сондай-ақ кейбір медициналық ұйымдарда кредиторлық берешекті жаппай жатып, қызметкерлерге сыйақы төленген. Бұдан басқа 694 млн теңге көлеміндегі лауазымдық айлықтарды ұлғайту фактілері анықталды.

“Алматы қаласының бірінші көпбейінді ауруханасының бөлімше меңгерушісінің жалақысы 357 мың теңге болғанда 11 ай үшін 15 млн теңге төленді. Сондай-ақ, аға мейірбике жалақысы 185 мың теңге болған кезінде 7 млн теңге қаржыдан төленді. Жамбыл облысының қалалық көпбейінді ауруханасының кредиторлық берешегі бола тұрып, 391 млн теңгеге сыйақы төленген", - деді Әлназарова.

Антикор жүргізген тексерудің нәтижесі бойынша негізсіз төлемдер бүгінде 1,3 млрд теңгені құраған.

"Жетісу облысында бас дәрігерлер мен бухгалтерлерге 389 млн теңге қаржыға ынталандыру үстемелері заңсыз төленген. СҚО, Павлодар облысында және Астана қаласында 332,9 млн теңге көлеміндегі қаржы жымқыру фактілері де анықталды. Алматы қаласындағы ауруханалардың бірінде бас бухгалтер басқа біреудің атымен деректі енгізу арқылы өз шотына 341 млн теңге аударған. Осындай жағдай Абай және Маңғыстау облыстарында да болған. Атырау облысында емхананың бас дәрігері 171 млн теңге жымқырған”, – деді ДСМ басшысы.

Соңғы жаңалықтар