ДДСҰ ескерту жасады: Сапасыз тағамнан жыл сайын 1,5 миллион адам көз жұмады

Жыл сайын әлемде 860 миллионнан астам адам сапасыз азық-түліктен уланып, аурухана төсегіне таңылады. Ең қорқыныштысы - соның салдарынан 1,5 миллион адам көз жұмады. Бұл сұмдық статистиканы ДДСҰ 7 маусым - Дүниежүзілік тағам қауіпсіздігі күні қарсаңында жариялады.

«Қауіпсіз тағам әрбір отбасы мен әрбір күнге қатысты маңызды мәселе», - деп дабыл қақты ДДСҰ бас директоры Тедрос Аданом Гебрейесус.

Оның айтуынша, бұл мәселенің адам өмірі мен экономикаға тигізетін зардабы осы уақытқа дейін ескерусіз қалып келген.

Сапасыз тағам тек денсаулыққа емес, экономикаға да орасан зор соққы болуда. Тек бір жылдың ішінде өнімділіктің төмендеуінен әлемдік экономика 310 миллиард доллар шығынға ұшыраған.

Сарапшылар жағдайды жаһандық жылыну да ушықтырып тұрғанын ескертеді. Ауа райының күрт өзгеруі мен аптап ыстық тағамдардың тез бұзылуына және қауіпті бактериялардың найзағайдай жылдам таралуына әкеп соғуда.

ДДСҰ бұл апаттың алдын алуға болатынын айтады. Ол үшін таза су, санитарлық талаптарды қатаң сақтау және өнімдерді дұрыс өңдеу (мысалы, пастеризациялау) жеткілікті. Сатып алатын тағамыңызға барынша абай болыңыз!