Дастан Сәтбаев Чемпиондар лигасындағы алғашқы голын соғып, рекорд орнатты

Алматылық «Қайраттың» 16 жастағы шабуылшысы Дастан Сәтбаев УЕФА Чемпиондар лигасындағы алғашқы ойынында гол соғып, Қазақстан футбол тарихына енді. Ол бұл жетістікке 16 жастан 331 күн асқан шағында жетіп, Чемпиондар лигасында гол соққан ең жас қазақстандық атанды.

Сәтбаев 8 шілде күні Люблянада өткен Словенияның «Олимпиясына» қарсы ойында мергендігімен көзге түсті. Бұған дейін бұл рекорд Абат Айымбетовке тиесілі болған. Ол 2014 жылы 18 жас 11 ай 16 күнінде «Ақтөбе» сапында Тбилисидің «Динамосына» гол соққан болатын.

Сонымен қатар Дастан Чемпиондар лигасының іріктеу кезеңдерінде гол соққан ең жас ойыншылардың үздік үштігіне енді. Рекорд Швеция футболшысы Никлас Беркротқа тиесілі. Ол 16 жас 6 ай 4 күнінде гол соққан. Екінші орында – 16 жас 8 ай 16 күнінде гол салған польшалық Влодзимеж Любаньски.

«Олимпия» мен «Қайрат» арасындағы матч 1:1 есебімен тең аяқталды. Қарымта ойын 15 шілде күні Алматыдағы Орталық стадионда өтеді.