Дәрігерлерге қол көтергендерге 15 жылға дейін бас бостандығынан айыру жазасы енгізіледі

Елімізде медицина қызметкерлеріне күш қолданғандарға қатысты Қылмыстық кодекске жаңа бап енгізіліп, 15 жылға дейін түрме жазасы қарастырылмақ. Бұл туралы Денсаулық сақтау министрі Ақмарал Әлназарова Үкімет үйінде өткен брифингте мәлімдеді.

Министрдің айтуынша, бүгінгі күні елде әр ай сайын дәрігерлерге күш қолдану деректері тіркеліп отыр. Осыған байланысты Бас прокуратура мен Ішкі істер министрлігі оң қорытынды берген заңнамалық өзгерістер пакеті әзірленген.

"Қылмыстық кодекске медицина қызметкерлеріне шабуыл жасауға байланысты 158-1-бап енгізіледі. Бұл бап аясында шектеу немесе бас бостандығынан айыру жазасы қарастырылады", – деді министр.

Жаңа түзетулерге сәйкес:

• Қорқыту фактісінің өзі тіркелсе – 2 жылға дейін шектеу жазасы тағайындалады;

• Егер бір дәрігерге күш қолданылса – 2 жылдан 7 жылға дейін бас бостандығынан айыру;

• Төтенше жағдай кезінде – 10 жылға дейін;

• Бірнеше медицина қызметкеріне күш қолдану – 15 жылға дейін бас бостандығынан айыру жазасын қарастырады.

Ақмарал Әлназарова бұл түзетулер медицина қызметкерлерін қорғаудың тиімді және уақтылы шарасы екенін атап өтті. Заң жобасы қыркүйекте Парламентке енгізіледі.

Вице-премьер Ермек Қошербаевтың айтуынша, енді дәрігерлерге жасалған шабуыл құқық қорғау органдары қызметкерлеріне шабуылмен теңестіріледі, яғни олардың қызметтік міндетін орындау кезінде көрсетілген зорлыққа балама жауапкершілік жүктеледі.

Еске салайық, бұған дейін депутаттар осындай заңнамалық өзгерістерді үш рет ұсынған, алайда Үкімет оларды қолдамаған болатын. Тек мемлекет басшысының тапсырмасынан кейін бұл бастама заң жобасы ретінде іске асып жатыр.