"Дәрігерлер 20 мың теңге сұраған": Жамбыл облысында перзентханада нәресте шетінеп кетті

Жамбыл облыстық перинаталдық орталығында жаңа туған нәресте шетінеп, анасы жансақтау бөлімінде ауыр халде жатыр. Туыстарының айтуынша, акушерлер кесарь тілігін жасау үшін 20 мың теңге сұраған. Бұл туралы «Астана» арнасы хабарлады.

Тұрар Рысқұлов ауданының тұрғыны Гүлім Оразбаева айы-күні жетіп, аудандық дәрігерлердің жолдамасымен облыстық перинаталдық орталыққа келген. Тексеру кезінде іштегі баланың жағдайы жақсы деп танылған. Алайда туыстарының сөзінше, дәрігерлер әйелдің медициналық картасын қарамай, оны жеті күн бойы босандырмай ұстап отырған.

Ақыры әйел өздігінен босанып, 4 келі 400 грамм салмақтағы сәби дүниеге келген, бірақ бір сағаттан кейін нәресте көз жұмған. Ал анасы қатты қан кетіп, жансақтау бөліміне түскен.

Марқұмның туыстары дәрігерлерге сенімсіздік білдіріп отыр.

«20 мың теңге сұрағанда, әйелім “аман босансам, кейін берем” деген. Егер алдын ала бергенде, олар сол күні кесарь тілігін жасап, баланы аман алып қалар еді», – дейді жолдасы Ермұхан Әміреев.

«Сіңілім өздігінен босана алмайды, оны кесарьвомен осы жаққа жіберіп тұр. Дәрігер менің сіңілімнің медициналық картасын қараған кезде, оның бетінде кесарьво дегенді оқыған кезде оны дүйсенбі күні, болмаса сейсенбі күні жасап қою керек еді. Мен жанында болдым, "кесарьво жасашы, кесіңдерші" деп жылаған кезде де бізге "өзі туады, өзі туады" деп аяғына дейін сіңілімнің өмірін қатерге тікті. Ақырында бала өлді», – деді әпкесі Айгерім Маратқызы.

Қазір бұл жағдайға байланысты қызметтік тексеріс басталды.

«Оқиғаны зерттеу үшін жұмыс тобы құрылды. Тексеруге тәуелсіз сарапшылар қатысады. Заң бойынша босану кезінде ешқандай ақша талап етілмеуі тиіс. Барлық қызмет тегін көрсетіледі», – деді Жамбыл облыстық денсаулық сақтау басқармасы басшысының орынбасары Ерік Мұсабаев.

Егер дәрігерлердің ақша талап еткені дәлелденсе, бұл іс қылмыстық тергеуге ұласуы мүмкін.

Туыстары кінәлілердің жауапқа тартылуын талап етіп отыр.