Дәрігердің айлығы – 120 мың теңге: Денсаулық сақтау вице-министрі не дейді?

Патологоанатом дәрігердің 120 мың теңге жалақысы қоғамда қызу талқыланғаннан кейін Денсаулық сақтау вице-министрі Тимур Мұратов бұл жағдайға пікір білдірді.

Threads әлеуметтік желісінде жарияланған жазбада қазақстандық дәрігер өз айлығының 120 мың теңге екенін айтып, қоғам назарын аударған болатын.

Бүгін Үкіметтегі брифингте вице-министр бұл жалақының тым төмен екенін мойындады.

«Шыны керек, біз дәрігерлерге аз төлейміз. Әлемнің барлық елінде медицина – ең жоғары жалақы төленетін салалардың бірі. Бірақ елдегі қазіргі экономикалық жағдайды да ескеруіміз керек. Қазір, өкінішке қарай, бұдан артық төлей алмаймыз», – деді Тимур Мұратов.

Сонымен қатар ол медициналық ұйымдарға өзге қызмет түрлерінен табыс табуға мүмкіндік берілгенін, бұл дәрігерлерге қосымша ақы ретінде берілуі мүмкін екенін айтты.

«Біздің ауруханалар мен емханалар шаруашылық жүргізу құқығына ие. Олар ақысыз қызметтерден бөлек, қосымша ақылы қызмет көрсетіп, табыс таба алады. Мысалы, жүкті әйелдер өз қалауы бойынша акушер таңдай алатын ақылы бөлімдер бар. Сол табыс дәрігерлерге сыйақы немесе үстемақы түрінде төленеді», – деді ол.

Мұратовтың айтуынша, дамыған елдерде жоғары жалақы тікелей міндетті медициналық сақтандыру қорына төленетін жарналардың көлеміне байланысты.

«Мысалы, Оңтүстік Кореяда медициналық сақтандыру жарналары жоғары болғандықтан, дәрігерлердің айлығы да едәуір көп», – деп түсіндірді вице-министр.

Ол патологоанатом дәрігердің жағдайын жеке қарап шығуға уәде берді. Тимур Мұратовтың айтуынша, орташа алғанда, дәрігерлердің медиандық айлығы шамамен 400 мың теңге көлемінде.