Данияр Елеусінов ішімдікке тәуелділікпен күресіп жүргенін айтты

Олимпиада чемпионы Данияр Елеусінов ішімдікке тәуелділікпен күресіп жүргенін ашық айтты. Боксшы әлеуметтік желі арқылы қазақстандықтарға үндеу жасап, бұл мәселе Олимпиададан кейін басталғанын жеткізді.

Елеусінов бұған дейін мас күйінде көлік жүргізіп, жол апатына ұшырағаны үшін өзін сынап жатқандарға жауап берді. Спортшы ішімдікке әуестігі уақыт өте келе тәуелділікке айналғанын мойындады.

«Иә, мойындаймын, Олимпиададан кейін ішімдікке әуестігім пайда болды, маскүнемдікке бейім бола бастадым», – деді ол.

Боксшы мұның қалай ауруға айналғанын өзі де толық түсінбейтінін айтып, мұндай жағдайға тап болған адамдарды мазақ етпеуге және сөкпеуге шақырды.

«Бүгін күлген нәрсең ертең өзіңнің сынағыңа айналуы мүмкін. Өздеріңіз осындай жағдайдан өтпейінше, айыптамаңыздар», – деді Елеусінов.

Спортшы Олимпиада чемпионы, әлем чемпионы атанып, Азия ойындарында жеңіске жеткеніне қарамастан, өмірінде осындай қиындыққа тап болғанын айтты. Ол мұны өзінің басына түскен сынақ деп қабылдайтынын жеткізді.