«Creative aimaq»: Түркістан облысы Астанада мәдени-инновациялық іс-шара өткізеді

Тамыздың 29-ы мен 30-ы күндері Астана төрінде Түркістан облысының шығармашылық әлеуеті мен ұлттық мұрасын таныстыратын «Creative aimaq» ауқымды іс-шарасы жалауын желбіретеді, деп хабарлайды Түркістан облысы әкімдігінің баспасөз қызметі.Бұл айтулы жиын өңірдің ғасырлар бойы сақталған тарихи-мәдини құндылықтарын, ұлттық қолөнерін және заманауи креативті индустриядағы серпінді қадамдарын елорда халқына паш етуге арналған.

Мәдениет пен инновация тоғысатын бірегей алаңда этноөнім өндірушілер, сән әлемінің шеберлері, керамика мен зергерлік өнердің майталмандары, сондай-ақ суретшілер мен дизайнерлер өздерінің авторлық туындыларын назарға ұсынады.

Шараға келген әрбір қонақ ұлттық нақышта дайындалған бұйымдардың жасалу барысын көріп қана қоймай, тәжірибелі шеберлердің интерактивті сабақтарына қатыса алады. Іс-шара шеңберінде Түркістаннан арнайы келген 30-дан астам қолөнерші өз бұйымдарын ұсынса, 12 қылқалам шеберінің 100-ге жуық үздік туындысы көрмеге қойылады. Мұнымен қоса, белгілі дизайнер Айжан Абдубаитова ұлттық ою-өрнекті заманауи трендтермен шебер үйлестірген эксклюзивті сән топтамасын көпшілікке паш етпек.

Жәрмеңке бағдарламасы тек қолөнермен шектелмейді. Мұнда жасанды интеллект, цифрлық технологиялар, инновациялық стартаптар көрмесі өтіп, сән көрсетілімдері мен шығармашылық кездесулер ұйымдастырылады. Екі күн бойы жалғасатын бұл мәдени жиын Түркістан өңірі өнерпаздарының әсем әуенді концерттік бағдарламасымен өрнектеледі. Тарих пен заманауи инновацияны тоғыстырған бұл жоба өңірлік брендтерді танытып, инвестициялық әрі туристік тартымдылықты арттыруға зор серпін береді.