Бюджет ақшасы желге ұшты ма: аудиторлар 154 млрд теңгенің кемшілігін тапты

Жоғарғы аудиторлық палата 2024 жылғы мемлекеттік қаржыға жүргізілген аудит нәтижесінде 154 млрд теңгеге жуық қаржылық заңбұзушылықты және 708 млрд теңге көлемінде бюджет қаражатын тиімсіз жоспарлау мен пайдалану фактілерін анықтады. Сонымен қатар 10 мыңнан астам рәсімдік бұзушылық тіркелген.

Ең ірі қаржылық заңбұзушылықтар республикалық деңгейдегі квазимемлекеттік сектор субъектілерінде – 46 млрд теңге және республикалық бюджет есебінен қаржыландырылатын мемлекеттік мекемелерде – 23,1 млрд теңге көлемінде анықталған. Бұзушылықтар ең көп тіркелген ведомстволар қатарында Ғылым және жоғары білім министрлігі (12,6 млрд теңге), Ішкі істер министрлігі (6 млрд теңге) және Экология және табиғи ресурстар министрлігі (2,3 млрд теңге) бар.

Нәтижесінде 175 жеке және заңды тұлға әкімшілік жауапкершілікке, 198 лауазымды тұлға тәртіптік жауапкершілікке тартылды. Аудит нәтижелері бойынша 1674 материал әкімшілік іс қозғау үшін, 16 материал құқық қорғау органдарына жолданды.