Былтыр жалпы ішкі өнім көлемі 288 млрд долларға жетті

Астана қаласында өткен Қазақстан-Словения бизнес-форумына Қазақстан Республикасының Президенті Қасым-Жомарт Тоқаев пен Словения Президенті Наташа Пирц-Мусар қатысты.

Мемлекет басшысы екі ел арасында өзара сенім мен құрметке негізделген берік саяси-дипломатиялық байланыс орнағанын және экономикалық ынтымақтастықты тереңдетуге мүдделі екенін атап өтті.

Экономика мен реформалар:
Президенттің айтуынша, 2024 жылы Қазақстан экономикасы 4,8% өсіп, жалпы ішкі өнім көлемі 288 млрд долларға жетті. Елде ауқымды саяси және экономикалық реформалар жүргізіліп жатыр, бұл даму қарқынын сақтауға сеп болмақ.

Транскаспий бағыты және логистика:
Қазақстан Еуразиядағы жетекші сауда және логистика хабына айналуды көздейді. Бүгінде еліміздің аумағы арқылы өтетін жүк тасымалының көлемі 514 млрд тонна-шақырымға жеткен. Құрлықтық жүк тасымалының 90%-ын Қазақстан қамтамасыз етуде.
Ақтау және Құрық порттары арқылы жөнелтілетін жүктің көлемі 62%-ға өсіп, 4,5 млн тоннаға жетті. Осы бағытта Словенияның ең ірі теңіз порты — Копермен әріптестікті тереңдету көзделіп отыр.

Энергетика және пайдалы қазбалар:
Қазақстан мұнайының 70%-ы Еуропа Одағы елдеріне экспортталады. Елдің барланған газ қоры – 3 трлн текше метр, көмір қоры – 34 млрд тонна.
Сонымен қатар Қазақстан ЕО үшін маңызды саналатын 34 сирек минералдың 19-ын өндіреді. Осы ресурстарды игеру барысында «шикізат орнына инвестиция мен технология» қағидатына сәйкес әлемдік компаниялармен әріптестік орнатылуда.
Total, Eni, Masdar және Svevind Energy Group сынды ірі компаниялармен жасыл энергетика жобалары жүзеге асырылып жатыр. Словенияның Iskra, Gorenje сынды компаниялары Қазақстан нарығында табысты жұмыс істеп келеді.

Ауыл шаруашылығы және азық-түлік қауіпсіздігі:
Қазақстан ауыл шаруашылығы өнімдерін 70-тен астам елге экспорттайды. Енді агроөнеркәсіп кешенін жоғары технологиялы сала ретінде дамыту жоспарда тұр. Осы бағытта словениялық әріптестермен бірлескен жобалар қолға алынбақ.

Фармацевтика және ІТ:
Қазақстан Krka, Lek секілді словениялық фармацевтикалық компаниялармен серіктестік орнатуға мүдделі. Сонымен қатар ІТ саласында ғылыми зерттеулер, стартаптар мен технологиялық білім беру салаларында да тығыз ынтымақтастық көзделіп отыр.

Қаржы және инвестициялар:
Словения кәсіпкерлеріне Астана халықаралық қаржы орталығының мүмкіндіктері таныстырылып, оның экожүйесіне қосылу ұсынылды.