Былтыр бюджетке 730 млрд теңге салық түспей қалды

2025 жылы республикалық бюджетке жоспарланған көлемнен 730 миллиард теңге аз салық түсті. Бұл туралы Жоғары аудиторлық палатаның салық және кедендік әкімшілендірудің тиімділігіне жүргізген мемлекеттік аудитінің қорытындысында айтылды.

Аудиторлардың мәліметінше, оған салық түсімдері бойынша болжамның 1,3 триллион теңгеге артық жоспарлануы негізгі себептердің бірі болған.

«Соңғы төрт жылда салық төлеушілер қосымша есептелген салықтарға қатысты даулардың жартысынан көбінде жеңіске жеткен. Бұл салықтық тексерулер сапасын күшейту қажет екенін көрсетеді», – делінген Жоғары аудиторлық палата есебінде.

Кеден саласында да бірқатар заңбұзушылық анықталған. Атап айтқанда, гибридті көліктер электр көлігі ретінде рәсімделіп, заңсыз жеңілдіктер алған. Соның салдарынан бюджет шамамен 70 миллион теңге кірістен айырылған.

Сондай-ақ сыртқы экономикалық қызметке қатысатын 34 компания қосылған құн салығын есепке алу тәсілін заңсыз қолданып, бюджетке 670 миллион теңгеден астам қаржы төлемеген.

Аудит барысында уәкілетті экономикалық операторлардың қызметіне бақылаудың әлсіздігі және аяқкиімді міндетті таңбалау жүйесінің салық жинауда толық пайдаланылмай отырғаны да анықталды.

Жалпы аудит нәтижесінде 2,7 миллиард теңге көлемінде қаржылық заңбұзушылық, 33 рәсімдік бұзушылық және 11 жүйелі кемшілік тіркелген. Жоғары аудиторлық палата барлық аудит нысандарына анықталған олқылықтарды жою жөнінде нұсқама жолдады.