Бұрынғы Талғар әкімі отставкадан кейін такси жүргізіп жүр

Талғар қаласының бұрынғы әкімі Арыстанбек Әбілқайырұлы қызметінен кеткеннен кейін қалай күн көріп жүргенін айтты. Ол бұл туралы «Уақыт көрсетеді» ток-шоуына берген сұхбатында мәлімдеді.

Экс-әкімнің айтуынша, қазір ол такси жүргізушісі болып жұмыс істейді.

«Қазір түнгі үш-төртке дейін такси жүргіземін. Жүріп жүрген көлігім жалға алынған, өзімнің көлігім жоқ. Үйде жай ғана отыруға ұялдым. Балаларымды асырау керек. Күн сайын 18 500 теңге жоспар тапсыруым керек», – деді ол.

42 жастағы Арыстанбек Әбілқайырұлы ақпанда Facebook парақшасында қызметінен кететінін жариялаған. Ол отставкасының себебі ретінде денсаулығының нашарлауын атаған.

Бұрынғы әкімнің сөзінше, денсаулықтағы мәселелер әкесі қайтыс болғаннан кейін басталған.

«Екі жыл бұрын әкем қайтыс болды. Бұл маған қатты әсер етті. Отбасындағы барлық жауапкершілік маған түсті. Кейін аудандық мәслихат депутаты болдым, одан соң әкімдікке кандидатура ұсындым. Талғарда мәселелер өте көп, халық саны 100 мыңнан асады. Барлық сұрақ әкімдікке келеді. Бұл жүйкеме қатты әсер етті», – деді ол.

Әбілқайырұлы өткен жылдың желтоқсанында денсаулығына байланысты кардиологиялық орталықта тексеруден өткенін айтты. Дәрігерлер оның жүрегінде тесік барын және бірнеше ішкі ағза ауруын анықтаған.

Бұрынғы әкімнің айтуынша, денсаулығы толық қалпына келмегендіктен жұмыс істеу қиын болған.

Сонымен бірге ол егер ұсыныс түссе, мемлекеттік қызметке қайта оралуға дайын екенін айтты.