Бұрынғы Сыртқы істер министрі Ермек Көшербаев жаңа қызметке тағайындалды

Президент Қасым-Жомарт Тоқаевтың жарлығымен Ермек Көшербаев Қазақстанның Аустриядағы Төтенше және Өкілетті Елшісі болып тағайындалды. Ол сондай-ақ Қазақстанның Вена қаласындағы халықаралық ұйымдар жанындағы Тұрақты өкілі қызметін атқарады, деп хабарлады Ақорда.

Мемлекет басшысының тағы бір жарлығымен Еркін Тұқымов Қазақстанның Пәкістандағы Төтенше және Өкілетті Елшісі болып тағайындалды. Осыған байланысты ол бұрынғы қызметінен босатылды.

Сонымен қатар Сәулекүл Сайлауқызы Қазақстанның Мароккодағы Төтенше және Өкілетті Елшісі және Тогодағы Төтенше және Өкілетті Елшісі қызметін қоса атқарудан босатылды.

Ермек Көшербаев бұған дейін Қазақстанның Сыртқы істер министрі қызметін атқарған. Ол бұл лауазымға 2025 жылғы қыркүйекте тағайындалған. Оған дейін Премьер-министрдің орынбасары және Шығыс Қазақстан облысының әкімі болды.

Көшербаев дипломатиялық қызметте де бірнеше лауазым атқарған. 2019–2020 жылдары Сыртқы істер министрінің орынбасары, 2020–2023 жылдары Қазақстанның Ресейдегі Төтенше және Өкілетті Елшісі болды. Ол КСРО Сыртқы істер министрлігінің Дипломатиялық академиясын «халықаралық қатынастар және сыртқы саясат» мамандығы бойынша бітірген.