Бурабайдың ең танымал нүктесіне кіруге тыйым салынды

Бурабай ұлттық табиғи паркінің ең биік әрі ең танымал нүктесі – Көкшетау тауына шығуға уақытша тыйым салынды. Құзырлы органдар бұл қадамды өңірдегі өрт қаупінің «төтенше» деңгейге жетуімен түсіндіріп отыр.

Ақмола облыстық iKomek қызметінің мәліметінше, аталған шектеу демалушылардың қауіпсіздігін қамтамасыз ету және ұлттық парктің бірегей табиғатын сақтап қалу мақсатында енгізілген.

Мамандардың алаңдауына 17 маусымда орын алған оқыс оқиға негіз болды: сол күні найзағай түсуі салдарынан ұлттық парк аумағында орман өрті тұтанған еді. Қазіргі таңда Ақмола облысында 24 маусымға дейін дауылды ескерту жарияланып, ауа температурасы +38 градусқа дейін көтерілуде. Мұндай аптап ыстықта таулы аймақтағы өрт қаупі өте жоғары деңгейде деп бағаланып отыр.

Әкімшілік Көкшетау тауына баратын барлық бағыттардың өрт қаупі сейілгенге дейін жабық болатынын ескертеді. Өңірдегі ауа райы тұрақталғанға дейін күшінде болады. Демалысты жоспарлап отырған азаматтардан қауіпсіздік ережелерін қатаң сақтап, маршруттарды алдын ала өзгерту сұралады.

Ұлттық парк басшылығы орман аумағында от жағуға және кез келген ашық отты қолдануға қатаң тыйым салынғанын еске салады. Әрбір азаматтың жауапкершілігі – табиғатты апаттан сақтап қалудың кепілі.