"Бұл тек шантаж": Руслан Берденов өзін атып кеткен Ернар Жиенбайдың соттағы мәлімдемесіне жауап берді

Шымкент әкімінің орынбасары Руслан Берденов өзін атып кеткені үшін айыпталып жатқан Ернар Жиенбайдың соттағы сөздеріне байланысты алғаш рет мәлімдеме жасады. Шенеуніктің айтуынша, айыпталушының айтқандары – «шантаж және қысым көрсету әрекеті».

Берденов Instagram парақшасында жазғандай, оқ атқан күннен кейін Жиенбаймен байланыс болмаған. Алайда айыпталушы өкілдері оның қорғаушыларымен хабарласып, кешірім берілсе «шу көтермейміз», ал бас тартса – «ақпараттық шабуыл» жасаймыз деп сес көрсеткен.

"Қақтығыстың түп-төркіні – кәсіби, қызметтік сипатта. Ол келісім аясындағы жұмысын адал атқарғысы келмеді, есеп беруден жалтарды. Ал қоғам назарын «қызғаныш», «жеке қатынас», «жұбайы» деген жалған себептерге аудару – манипуляция. Мен мұндай мәлімдемелерді үзілді-кесілді жоққа шығарамын және оларды мойындамаймын", – деп жазды Берденов.

Ол Жиенбайдың қала әкіміне қатысты айтқанын да жоққа шығарып, мұны істің мәнін бұрмалау және беделге нұқсан келтіру деп атады.

Берденовтің айтуынша, қазіргі уақытта ол денсаулығына байланысты сотқа жеке қатыса алмай отыр, алайда процесті және оған қатысты ақпараттық кеңістіктегі ахуалды мұқият бақылауда.

"Соттағы жоқтығымды, үнсіздігімді өздеріне тиімді жағына бұрып, қоғамдық пікірмен ойнағысы келетіндер бар. Бірақ үнсіздік келісім деген сөз емес. Мен әділетті сотты күтіп отырмын", – деп түйіндеді ол.

Еске салайық, бүгінгі сот отырысында Ернар Жиенбай Руслан Берденовті өлтіру ниеті болмағанын, тек қорқытқысы келгенін айтты. Ол сондай-ақ жәбірленуші тараптың өзінен қала әкімі Ғабит Сыздықбековті «киллер жалдады» деп көрсетуін талап еткенін мәлімдеді.