"Бұл соғыстың нүктесін келіссөз емес, қару қоятын секілді" – сарапшы

Саясаттанушы Нұрмұхамед Байғараев «Baigarayev Sarap» Telegram арнасында 6–15 тамыз аралығында халықаралық саясатта болып жатқан және алда күтілетін маңызды оқиғаларға талдау жасады. Оның айтуынша, бұл күндер Украинадағы соғыстың болашағына ықпал етуі мүмкін.

6 тамызда Дональд Трамптың өкілі Уиткофф пен Владимир Путин кездескен. Көп ұзамай екі ел басшысының 15 тамызда АҚШ-тың Альяска штатында жүздесетіні белгілі болды. Байғараевтың айтуынша, осыдан кейін Путин алты елдің, ал Украина президенті Владимир Зеленский екі елдің басшыларымен сөйлесіп, дипломатиялық қолдау іздеуге кірісті.

8 тамызда Әзербайжан мен Армения АҚШ астанасы Вашингтонда келісімге келіп, Оңтүстік Кавказдағы ресейлік ықпалды әлсіретті. Саясаттанушы бұл жағдайға Кремльдің жауап бергенін, атап айтқанда, Әзербайжанның Украинадағы газ инфрақұрылымдарына дронмен соққы жасалғанын еске салды.

9 тамызда Лондонда АҚШ вице-президенті, Ұлыбритания министрі және Зеленскийдің өкілдері бас қосып, Байғараевтың болжамынша, Альяскадағы кездесу тақырыптарын талқылады. 10 тамызда Украина Ресейдің Коми өңіріндегі мұнай зауытын дронмен атқылап, бір мезетте екі мақсатқа жетті: майданға жанармай жеткізуді қиындатты және ресейліктерге соғыс өз үйлерінің жанында жүріп жатқанын сезіндірді.

Саясаттанушы сонымен қатар Ресей элитасы арасында соғысты тоқтату туралы пікірлер айтыла бастағанын атап өтті. Санкциялар мен шығындардың артуы Кремльге ішкі қысымды күшейтіп отыр.

Альяскадағы кездесуге қатысты Байғараев бірнеше болжам айтты. Оның ойынша, Ресей белгілі бір жеңілдіктерге баруы мүмкін, себебі экономикасы әлсіреп, майдандағы шабуылы тоқырап тұр. Дегенмен Мәскеу Қырым мен Донбасты өз бақылауында қалдыру талабынан бас тартпайды. Ал Зеленский бейбіт келісім үшін жер бермейтінін мәлімдеп, бұл ұстанымды Еуропа да қолдап отыр.

"Өз басым Альяскадағы кездесуден керемет нәтиже күтпеймін. Бұл соғыстың нүктесін келіссөз емес, қару қоятын сияқты. Қатты қателескім келеді, бірақ соңғы 3,5 жылда талай келіссөз еш нәтиже бермеді", – дейді саясаттанушы.

Сонымен бірге ол Дональд Трамп күтпеген қадам жасап, соғысты екі тарапты қанағаттандыратындай етіп тоқтатса, бір жылда бес қақтығысты тоқтатқан тұлға ретінде тарихта қалып, Нобель сыйлығын сөзсіз иеленетінін айтты.