«Бұл адам құқықтарын шектеу емес, ұлтты қорғау» – Еділ Жаңбыршин ЛГБТ насихатына тыйым салатын заң жайлы

Мәжіліс депутаты Еділ Жаңбыршин ЛГБТ насихатын шектеуге арналған заң нормасын қолдап сөйлеп, бұл бастаманың ұлттың рухани қауіпсіздігін қорғауға бағытталғанын айтты.

Депутат соңғы жылдары ЛГБТ қозғалысының белсенді әрекеттері қоғамның түпкі құндылықтарына қауіп төндіріп отырғанын атап өтті.

"Бұл қасиетсіз топ қасиетті киіз үйімізде тайраңдап, ұлттық құндылықтарды аяққа таптады. Тіпті мектептерге барып, ашық насихат жүргізді. Кейін депутаттарға қарсы ақпараттық шабуыл жасап, жеке тұлға ретінде келемеждеді. Бұл барып тұрған бассыздық пен заң шығарушы органға қысым", – деді ол.

Жаңбыршиннің айтуынша, мұндай үдерістердің артында шетелдік, әсіресе АҚШ-тағы кейбір ұйымдар мен қорлар тұрған болуы мүмкін. Олар қазақ қоғамында дәстүрлі отбасылық құндылықтарды бұзуды көздеп, миллиондаған доллар қаржы бөледі.

Ол сондай-ақ былтыр E-petition.kz платформасында ЛГБТ насихатына қарсы петицияға 50 мыңнан астам адам қол қойғанын атап өтті.

"Бұл – ЛГБТ-нің елімізге қажетсіз әрі жат құбылыс екендігінің, оған халықтың ашық қарсылығының анық көрінісі", – деді Жаңбыршин.

Сонымен қатар ол Қазақстанның халықаралық міндеттемелері де балаларды теріс идеологиядан қорғауды көздейтінін еске салды.

"2022 жылы Қазақстан Женева декларациясына қосылды. Бұл құжатта әрбір егемен мемлекеттің өз ұлттық құндылықтарын және дәстүрлі отбасы институтын сақтау жөнінде дербес саясат жүргізуге құқылы екені нақты көрсетілген. Ең қызығы, бұл декларацияны АҚШ-тың өзі қабылдаған. Ал Трамп сол құжатқа сүйене отырып, бір жынысты некелерге шектеу қойып, енді Америкада тек ер және әйел жынысы бар екенін ресми мәлімдеді, – деді ол.

Еділ Жаңбыршиннің сөзінше, ЛГБТ-ны насихаттауды заңмен шектеу бойынша қабылдап жатқан нормалар кейбір халықаралық ұйымдар мен белсенділер айтып жүргендей ешқандай адам құқығын шектеуге бағытталмаған.

"Бұл нормалар дәстүрлі отбасылық институтты бұзудан және балалар мен жасөспірімдерді деструктивті идеологиялардан  қорғап, ұлттық қауіпсіздігімізді сақтауға, халқымыздың рухани иммунитетін нығайтуға септігін тигізеді. Ең бастысы, бұл нормалар ұлттың мүддесін қорғауға бағытталған, – деп түйіндеді ол.