Бүгіннен бастап жазғы дөңгелекпен жүрген жүргізушілерге айыппұл салынады

Қазақстанда 1 желтоқсаннан бастап көлікті жазғы дөңгелекпен жүргізуге болмайды. Бұл талапты бұзған жүргізушілерге 5 айлық есептік көрсеткіш (19 660 теңге) көлемінде айыппұл салынады.

Ереже қайта бұзылған жағдайда айыппұл 20 АЕК-ке (78 640 теңгеге) дейін өседі. 2026 жылдан бастап айыппұл сомасы да көбейеді, себебі айлық есептік көрсеткіш 4 325 теңгеге дейін өседі. Осылайша, алғашқы бұзушылық үшін айыппұл мөлшері 21 625 теңгені құрайды.

Кеден одағының «Дөңгелекті көлік құралдарының қауіпсіздігі туралы» техникалық регламентіне сай, 1 желтоқсаннан 28 ақпанға дейін жазғы шиналарды пайдалануға болмайды. Бұл ереже Қазақстанның Жол жүрісі қағидаларында да бекітілген және оны бұзу әкімшілік жауапкершілікке әкеледі.

Қысқы шиналардың түрлері:

– Шегелі шиналар – мұз бен көктайғақта жақсы ұстайды, бірақ сәл шулы және жанармай шығынын арттырады.

– Фрикциялық («липучка») шиналар – жұмсақ климат пен қала жағдайына қолайлы, дыбысы аз, бірақ мұзда ілінісу қасиеті төменірек.

Мамандар көліктің төрт доңғалағына да бірдей қысқы шиналар орнату қажет екенін ескертеді. Сондай-ақ өлшемі немесе протектор суреті әртүрлі дөңгелектерді бір оське қоюға болмайды.

Қысқы шиналардың протектор тереңдігі кем дегенде 4 мм болуы тиіс. Ал шинаның бүйір бөлігінде M+S немесе таудың үш шыңы мен қар ұшқыны бейнеленген таңба болуы қажет. Бұл оның қысқы маусымға арналғанын білдіреді.

Дөңгелектерді орнатқан соң тепе-теңдігін, бұрышын және қысымын тексеру ұсынылады. Орта есеппен қысқы шиналар 5–6 жыл қызмет етеді.