$ 538.54 € 628.31 ₽ 6.7

Бүгін «Қайрат» Чемпиондар лигасындағы қарсыластарын білетін болады: Жеребе тарту рәсімін қайдан көруге болады?

Абдрахманов Мағжан
28 тамыз 2025 16:48 397
Бүгін «Қайрат» Чемпиондар лигасындағы қарсыластарын білетін болады: Жеребе тарту рәсімін қайдан көруге болады? Сурет авторы: Instagram/ f.c.kairat

Бүгін, 28 тамызда, Алматының «Қайрат» футбол клубы 2025/26 маусымындағы Чемпиондар лигасының жалпы кезеңіндегі қарсыластарын білетін болады, деп хабарлады Sportburo.kz.

Жеребе сағат 21:00-де (Астана уақыты бойынша) басталады. Тікелей эфирді QazSport арнасы көрсетеді.

Бұл – «Қайрат» үшін тарихи жетістік. Клуб алғаш рет Еуропаның басты турнирінің жалпы кезеңіне шықты. Енді «сары-қаралар» құрлықтың үздік командаларына қарсы ойнауы мүмкін.

Өткен жылдан бастап Чемпиондар лигасы жаңа форматта өтіп жатыр. Бұрынғыдай 32 команда сегіз топқа бөлінбейді. Енді 36 клуб бірыңғай кестеде бақ сынайды, әрқайсысы сегіз түрлі қарсыласқа қарсы ойын өткізеді. Қарсыластар жеребе кезінде әртүрлі себеттерден таңдалады.

Бірінші себетке әлемнің алпауыт клубтары енді: ПСЖ, «Реал», «Манчестер Сити», «Бавария», «Ливерпуль», «Интер», «Челси», «Боруссия» Дортмунд және «Барселона».
Екінші себетте: «Арсенал», «Байер», «Атлетико», «Бенфика», «Аталанта», «Вильярреал», «Ювентус», «Айнтрахт» және «Брюгге».
Үшінші себетке: «Тоттенхэм», ПСВ, «Аякс», «Наполи», «Спортинг», «Олимпиакос», «Славия», «Буде-Глимт» және «Марсель» енген.

Алматының «Қайраты» төртінші себетке орналасты. Онда «Копенгаген», «Монако», «Галатасарай», «Юнион», «Қарабах», «Атлетик», «Ньюкасл» және «Пафос» бар. Бұл қазақстандық клуб кем дегенде бірінші себеттен екі, екінші себеттен тағы екі мықты командамен ойнайды дегенді білдіреді. Демек, «Қайраттың» «Реал», «Барселона», «Бавария», «Манчестер Сити» немесе «Ливерпульге» қарсы шығу ықтималдығы 40%-дан асады. Ал «Арсеналмен» кездесудің мүмкіндігі шамамен 22%.

Жеребе рәсімі гибридті форматта өтеді: командалардың атаулары жазылған шарлар қолмен алынғанымен, қарсыластарды түпкілікті бөлу компьютер арқылы анықталады.

Соңғы жаңалықтар