Бразилияның экс-президенті мемлекеттік төңкеріс жасамақ болғаны үшін 27 жылға сотталды

Бразилия Жоғарғы сотының судьялар коллегиясы елдің бұрынғы президенті Жаир Болсонаруды әскери төңкеріс дайындағаны үшін кінәлі деп танып, оны 27 жылға бас бостандығынан айырды. Бұл туралы BBC-дің орыс қызметі хабарлады.

Судьялардың төртеуі 70 жастағы саясаткерді айыпты деп таныды. Тергеу дерегінше, Болсонару 2022 жылғы сайлауда жеңілгеннен кейін билікті сақтап қалу мақсатында жасалған қастандықты басқарған. Сол сайлауда оның қарсыласы Луис Инасиу Лула да Силва жеңіске жетіп, қазіргі күні ел президенті қызметін атқарып отыр.

Сот қастандыққа әскердің толық қолдауы болмағанымен, оның салдары ауыр болғанын атап өтті. 2023 жылғы 8 қаңтарда Болсонару жақтастары ел астанасы Бразилиадағы мемлекеттік мекемелерге шабуыл жасаған.

Экс-президент бес бап бойынша кінәлі деп танылды: мемлекеттік төңкеріс ұйымдастыруға талпыныс, қарулы қылмыстық ұйымды басқару, демократиялық тәртіпті күшпен жоюға әрекет және Бразилиадағы тәртіпсіздіктер кезінде мемлекеттік ғимараттарға залал келтіру.

Жаир Болсонару денсаулығына байланысты сотқа қатысқан жоқ, ол қазір үй қамақта отыр. Оның адвокаттары үкімді «абсурдты және орынсыз» деп бағалап, барлық деңгейде, соның ішінде халықаралық инстанцияларда да шағынатынын мәлімдеді.