Босқа уақыт жоғалту емес, өмірді ұзарту: Кино мен театрға бару денсаулыққа қалай әсер етеді

Токио ғылым институтының ғалымдары жүргізген жаңа зерттеу нәтижелері мәдени өмірге белсенді араласудың адам ағзасының биологиялық жасына оң әсер ететінін көрсетті. Нәтижелер Journal of Epidemiology and Community Health журналында жарияланды.

Зерттеу барысында 50 жастан асқан 1 899 адамның деректері талданды. Сарапшылар мәдени іс-шараларға (театр, мұражай, кино немесе концерт) жиі баратын адамдардың физиологиялық жасы, мұндай шаралардан аулақ жүретін құрдастарымен салыстырғанда, айтарлықтай жас екенін анықтады.

Мәдени іс-шараларға жиі қатысатын адамдардың орташа физиологиялық жасы 66,9 жылды құраса, сирек қатысатындарда бұл көрсеткіш 69,9 жылға тең болған. Яғни, айырмашылық шамамен 3 жылды құрайды.

Зерттеушілердің пайымдауынша, мәдени белсенділік индексінің әрбір бір тармаққа өсуі физиологиялық жасты шамамен 31 күнге жасартып, ағзаның функционалдық жағдайын жақсартуға ықпал етеді.

Бұл әсерді ғалымдар тұрақты физикалық жаттығулардың ағзаға беретін пайдасымен салыстырады.

Ғалымдар бұл құбылыстың бірнеше себебін атап көрсетеді. Мәдениет ошақтарына бару адамның әлеуметтік байланысын нығайтып, психологиялық жай-күйін жақсартады және салауатты өмір салтын ұстануға ынталандырады. Бұл факторлар жиынтығы ағзаның тозу процесін баяулатуға септігін тигізеді.

Зерттеу тобы бұл байқау сипатындағы жұмыс екенін, сондықтан мәдени іс-шаралардың қартаюды тікелей баяулататынын нақты дәлелдеу үшін қосымша зерттеулер қажет екенін ескертеді. Дегенмен сарапшылар мәдени іс-шаралардың қолжетімділігін арттыру – қоғамдық денсаулық сақтау стратегиясының тиімді құралы болуы мүмкін деп санайды.