Боқаев ісі ұлттық компаниядағы жұмысына байланысты – Бас прокуратура

Алматыда наурыз айының ортасында ұсталған белсенді Санжар Боқаевқа қатысты қылмыстық іс оның ұлттық компаниядағы жұмыс кезеңімен байланысты. Бұл туралы Сенаттағы брифингте Бас прокурордың орынбасары Ерлан Өтегенов мәлімдеді.

Оның айтуынша, Боқаев аса ірі мөлшерде алаяқтық жасады және заңсыз ағаш кесуді ұйымдастырды деген күдікке ілінген. Қазіргі уақытта іс бойынша қажетті тергеу әрекеттері жүргізіліп жатыр.

«Қаржы жымқыру фактілері оның ұлттық компанияда жұмыс істеген кезеңіне қатысты. Тергеу аяқталғаннан кейін толық ақпарат беріледі», – деді Ерлан Өтегенов.

Ашық дереккөздердегі мәліметке сәйкес, Санжар Боқаев 2015–2017 жылдары «ҚазТрансГаз» ұлттық компаниясы басқарма төрағасының кеңесшісі қызметін атқарған.

Бұған дейін Бас прокуратура Боқаев аса ірі мөлшерде алаяқтық жасады, жалған ақпарат таратты және қоғамда теріс пікір қалыптастыру мақсатында видеоматериалдар жариялады деген күдікке ілінгенін хабарлаған.

Тергеу нұсқасы бойынша, Боқаев ағаш кесу жұмыстарын өзі ұйымдастырып, қаржыландырған. Бұл жұмыстарды орындау үшін әлеуметтік жағдайы төмен адамдарды ақшаға жалдаған деген болжам бар.

18 наурызда Санжар Боқаев ұсталып, сот санкциясымен қамауға алынған. Тергеу жалғасып жатыр.