Bloomberg: Дрон қаупіне қарамастан КҚК мұнай тиеуді қайта бастады

Каспий құбыр консорциумының (КҚК) теңіз терминалы арқылы қазақстандық мұнайды танкерлерге тиеу қайта басталды. Бұл туралы Bloomberg агенттігі хабарлады.

Агенттік мәліметінше, соңғы бірнеше күнде КҚК терминалында төрт танкерге қазақстандық мұнай тиелген. Бұдан бөлек, кемінде үш кеме тиеуді күтіп тұр.

Bloomberg-тің жазуынша, КҚК арқылы экспорттың қайта жандануы әлемдік мұнай нарығындағы қысымды төмендетуге ықпал етеді. Қалыпты жағдайда консорциум инфрақұрылымы арқылы әлемдік мұнай жеткізілімінің шамамен 2 пайызы тасымалданады.

Сонымен қатар агенттік Қара теңіздегі танкерлерге дронмен шабуыл жасау қаупі әлі де сақталып отырғанын атап өтті. Осыған байланысты кейбір кеме иелері КҚК терминалына танкерлерін жіберуге сақтықпен қарап отыр.

Әзірге Каспий құбыр консорциумы мұнай тиеудің қайта басталғаны туралы ресми мәлімдеме жасаған жоқ. Консорциумның Telegram-арнасындағы соңғы хабарлама жаңа мұнай өлшеу жүйесінің іске қосылуына, ал оған дейінгі жарияланым 30 шілдеде болған танкерге жасалған шабуылға арналған.

Шілде айында Қара теңізде КҚК терминалына бет алған бірнеше танкер дрон шабуылына ұшырап, олардың бірі мұнай тиеу кезінде зақымданған болатын.