Блогерлерге лицензия беріле ме? Қаржылық мониторинг агенттігі жауап берді

Қаржылық мониторинг агенттігі блогерлерге лицензия беру немесе оларды жеке тізімге енгізу жүйесін енгізуді қажет емес деп есептейді. Ведомствоның пікірінше, блогерлердің қызметі қазірдің өзінде қолданыстағы заңнамамен реттелген.

Бұл туралы ҚМА депутат Геннадий Шиповскихтың блогерлердің құқықтық мәртебесі мен жауапкершілігін күшейтуге қатысты сауалына берген ресми жауабында хабарлады.

Мәліметке сәйкес, қолданыстағы «Онлайн-платформалар мен онлайн-жарнама туралы» заңда блогер (инфлюенсер) ұғымы нақты анықталған және олардың кәсіпкерлік қызметті заң аясында жүзеге асыру міндеті көрсетілген.

"Жарнамадан табыс табатын блогерлер салық және жарнама, сондай-ақ онлайн-платформалар туралы заңнаманың талаптарына бағынады, – делінген агенттік жауабында.

Мәдениет және ақпарат министрлігі де қосымша лицензиялау немесе блогерлердің жеке тізімін құру артық әкімшілік кедергілер тудыруы мүмкін екенін атап өтті. Ведомство мұндай шаралар сөз бостандығын шектеу және азаматтардың пікірін еркін білдіру құқығына кедергі келтіру қаупін арттырады деп есептейді.

Сондай-ақ жауапта қолданыстағы әкімшілік жауапкершілік блогерлер мен инфлюенсерлердің онлайн-платформалардағы қызметін заң шеңберінде қамтамасыз етіп отырғаны айтылған. Сондықтан қосымша бақылау тетіктерін енгізу қажет емес деп қорытынды жасалды.