Блогер Әділетхан Молдаханға сот үкімі шықты

Алматының Алмалы аудандық соты көрінеу жалған ақпарат таратты деп айыпталған заңгер әрі блогер Әділетхан Молдаханды екі жыл алты айға бас бостандығынан айырды.

Сот оған блогерлік қызметпен айналысуға да тыйым салды. Жәбірленушілердің азаматтық талаптары ішінара қанағаттандырылды. Үкімнің заңды күшіне енгені туралы әзірге ақпарат жоқ.

Бұған дейін прокурор Молдаханды үш жылға бас бостандығынан айыруды сұраған. Жәбірленушілер айыптау тарапының талабын қолдап, оған блогерлік қызметпен айналысуға қосымша тыйым салуды өтінген еді.

Молдахан сотта тағылған айыпты толық мойындаған. Қорғаушылар бұлтартпау шарасын өзгертуді, істі жеңілдетілген тәртіппен қарауды және тараптарға татуласуға уақыт беруді сұраған. Алайда сот оны қамаудан босату туралы өтінішті қанағаттандырмады.

Оған Қылмыстық кодекстің 274-бабы 2-бөлігінің 3-тармағы бойынша айып тағылды. Бұл бап бұқаралық ақпарат құралдары немесе байланыс желілері арқылы көрінеу жалған ақпарат таратқаны үшін жауапкершілікті көздейді. Іс бойынша Алматы полиция департаменті бастығының бұрынғы орынбасары Ержан Ұзабаев пен қалалық әкімшілік полиция басқармасының бұрынғы басшысы Серік Шумаев жәбірленуші деп танылған.

Қылмыстық іс Алматыдағы Әл-Фараби даңғылында үш адам қаза тапқан жол апатынан кейін жарияланған бейнежазбаларға байланысты қозғалды. Молдахан жазбаларында түнгі жарысқа құқық қорғау органдары қызметкерлерінің қатысы болуы мүмкін деген болжам айтқан.

Жол апаты 21 наурызға қараған түні болған. Александр Пак жүргізген Zeekr қарсы жолаққа шығып, Mercedes көлігімен соқтығысқан. Соның салдарынан Mercedes жүргізушісі мен екі жолаушы қаза тапты. Кейін Пак 10 жылға бас бостандығынан айырылып, көлік басқару құқығынан өмір бойына айырылды.