БҚО-да кәмелетке толмаған қызды зорлады деп күдікке ілінген шенеунік ауруханада көз жұмды

Батыс Қазақстан облысында кәмелетке толмаған қызды зорлады деген күдікке ілінген Шыңғырлау аудандық әкімдігі бөлімдерінің бірінің қызметкері ауруханада қайтыс болды. Бұл туралы өңірлік полиция департаменті хабарлады.

Ведомство мәліметінше, ер адам 11 наурыз күні денсаулығының күрт нашарлауына байланысты Орал қаласындағы облыстық көпбейінді аурухананың жансақтау бөліміне жатқызылған. Дәрігерлер оған бауырдың токсикалық зақымдануы мен некроз, сондай-ақ қант диабетінің асқынуы диагнозын қойған. Ол 16 наурыз күні кешкі сағат 18:10 шамасында есін жимастан көз жұмған.

Аталған дерек бойынша сотқа дейінгі тергеу басталды. Тергеу мүддесіне байланысты өзге ақпарат жарияланбайды.

Еске салайық, 16 жастағы Ақсай тұрғынының арызы 2 қаңтар күні түскен. Іс Шыңғырлау аудандық полиция бөлімінде қаралған. Алғашында күдікті ұсталып, кейін босатылған. Тергеу барысында хат алмасуларды зерделеу нәтижесінде зорлық фактісі анықталмағаны хабарланған.

Кейін қыз бен оның анасы күдіктіге ешқандай шағымдары жоқ екенін айтып, қарым-қатынас өзара келісіммен болғанын мәлімдеген. Алайда жәбірленушінің әкесі бұл ақпаратпен келіспейтінін білдірді. Полиция өз кезегінде қылмыстық істің тергелуі жалғасып жатқанын атап өтті.

Күдікті аудан әкімдігінің бір бөлімінде жұмыс істеген. Арыз түскеннен кейін ол қызметінен босатылған. 25 ақпан күні ол қамауға алынған болатын.