БҚО-да белгісіз дрондардың ұшқаны туралы ақпарат тарады

Батыс Қазақстан облысында Ресеймен шекараға жақын «Сырым» өткізу бекеті маңында белгісіз дрондардың ұшқаны туралы ақпарат тарады. Бұл жөнінде Уральская неделя басылымы жазды.

Басылым деректеріне сүйенсек, шамамен онға жуық дрон екі күн қатарынан шекара маңында байқалған. Куәгерлер олардың Ресейдің Самара облысы жағынан келгенін айтқан.

Аталған ақпаратқа қатысты Қазақстан Қорғаныс министрлігі түсініктеме берді.

«Әуе кеңістігін бұзу фактілері тіркелген жоқ. Жағдай тиісті қызметтердің бақылауында», – деп мәлімдеді ведомство өкілдері.

Министрлік тұрғындарды сабыр сақтауға және расталмаған ақпаратты таратпауға шақырды.

Айта кетейік, соңғы жылдары Батыс Қазақстан облысында ұшқышсыз аппараттарға қатысты оқиғалар жиілеген. 2025 жылы өңірде кемінде бес дронның сынықтары табылған. Ал биыл наурызда Ақжайық ауданында белгісіз ұшқышсыз аппарат анықталған.