Биыл зейнетақы жинағын алуға арналған жеткіліктілік шегі көтеріле ме?

Қазақстанда 2026 жылы Бірыңғай жинақтаушы зейнетақы қорынан қаражатты мерзімінен бұрын алу үшін белгіленген жеткіліктілік шегі өзгертілмейді. Бұл туралы Еңбек және халықты әлеуметтік қорғау вице-министрі Виктория Шегай мәлімдеді.

Оның айтуынша, жеткіліктілік шегі жыл басында-ақ қайта қаралған. Әлеуметтік кодекске сәйкес, келесі кезеңге арналған көрсеткіштер жаңа жыл басталғанға дейін кемінде бір ай бұрын Бірыңғай жинақтаушы зейнетақы қорының ресми сайтында жариялануы тиіс.

Бұған дейін ведомство басшысы Асқарбек Ертаев соңғы бес жылда қазақстандықтар зейнетақы қорынан шамамен 5 трлн теңге шешіп алғанын хабарлаған. Оның ішінде 1 трлн теңгеге жуығын 20–35 жас аралығындағы азаматтар пайдаланған.

Ал Ұлттық банк төрағасы Тимур Сүлейменов жеткіліктілік шегін арттыру қажеттігін айтқан. Оның пікірінше, бұл болашақта лайықты зейнетақы төлемдерін қамтамасыз ету үшін маңызды.