Биыл балалар лагерлері ескертусіз тексеріледі

Қазақстан Республикасы Денсаулық сақтау министрлігі жазғы сауықтыру маусымының басталуы қарсаңында балалар лагерлеріне жүргізілетін мемлекеттік бақылаудың күшейтілетінін мәлімдеді. Негізгі өзгеріс - бұдан былай тексеру шаралары мекеме әкімшілігіне алдын ала ескерту жасалмай жүргізілетін болады.

Әкімдіктердің берген мәліметіне сәйкес, алдағы маусымда еліміз бойынша 179 маусымдық лагерь және жыл бойы жұмыс істейтін 20 нысан балаларды қабылдауға дайын. Министрлік талабы бойынша, әрбір демалыс орны жұмысын бастамас бұрын аумақты дайындап, санитарлық-эпидемиологиялық қорытынды алуға, сондай-ақ тиісті медициналық қызмет пен белгіленген сыйымдылық нормаларын сақтауға міндетті.

Тексеріс барысында келесі басымдықтарға ерекше назар аударылады:

• Аумақтың қоршалуы және жарықтандыру жүйесінің болуы;

• Үздіксіз сумен қамту және кәріз (канализация) жүйесінің жұмыс істеуі;

• Желдету жүйелері мен күнделікті дезинфекциялау жұмыстары;

• Бес реттік тамақтанудың сапасы мен нормативтерге сәйкестігі;

• Медициналық көмек көрсету пункттерінің жабдықталуы.

Сонымен қатар шомылу орындарына ерекше бақылау орнатылады. Мамандар су айдындары мен бассейндерден, сондай-ақ жағажай топырағынан жүйелі түрде зертханалық сынамалар алып отырады.

Мемлекеттік бюджеттен қаржыландырылатын барлық сауықтыру ұйымдары жылдың екінші жартыжылдығында мемлекеттік бақылаудың ерекше тәртібі бойынша тексеріледі. Жоспарлы тексерілетін нысандардың тізімі 10 мамырға дейін Санитарлық-эпидемиологиялық бақылау комитетінің аумақтық бөлімшелерінің сайттарында жариялануы тиіс. Ал бұл тізімге енбеген нысандар ескертусіз тексеру механизмі арқылы бақыланатын болады.