Биыл ақылы жолдар 30 пайызға қымбаттайды

Қазақстанда 2025 жылы ақылы жолдағы төлем тарифтері орта есеппен 30%-ға көтеріледі. Бұл туралы ҚР Көлік министрлігі Kazinform агенттігіне берген жауабында хабарлады.

Жаңа ақылы жолдар пайда болады

Қазіргі таңда елде 3,2 мың шақырым болатын 17 ақылы жол учаскесі жұмыс істеп тұр. Биыл 2,2 мың шақырымды қамтитын 10 жаңа ақылы жол іске қосылады. Олардың ішінде:

• "Балқаш – Бурылбайтал" (91 км) – барлық көлік түрі үшін ақылы болады.
• "Ақтөбе – Орынбор" (83 км), "Қостанай – Троицк" (163 км), "Қызылорда – Арал" (455 км), "Ақтау – Бейнеу" (454 км), "Қостанай – Денисовка" (169 км), "Үшарал – Достық" (180 км), "Қандыағаш – Мақат" (385 км), "Тараз қаласын айналып өту" (57 км) және "Шу – Бурылбайтал" (184 км) – бұл учаскелерде төлем тек жүк көліктерінен алынады.

Баға не үшін көтеріледі?

Ведомство тарифтің өсуі жолдарды жөндеу, күтіп-ұстау және жаңа арнайы техника сатып алу қажеттілігімен байланысты екенін түсіндірді. Сондай-ақ ақылы жолдардан түскен қаржы инфрақұрылымды жақсартуға бағытталады.

Жеңілдіктер қарастырылған ба?

Министрлік жергілікті тұрғындар үшін тарифтердің өсуін жеңілдету мақсатында:

• 15%-ға дейін жеңілдіктер,
• Абонемент сатып алу мүмкіндігі,
• Жолаушылар автобустарын төлемнен толық босату сияқты шараларды енгізуді жоспарлап отыр.

Ақылы жолдардың кейбір учаскесінде жөндеу жұмыстары аяқталғанға дейін төлем алынбайды.