Биыл 16 мамандық жойылады: Қай салаларда адамды робот алмастырады?

Биыл еңбек нарығынан 16 мамандық жойылады, деп хабарлады 24.kz. Ғылым және жоғары білім министрлігінің мәліметінше, агроөнеркәсіп, құрылыс және тау-кен салаларындағы кейбір мамандықтарға сұраныс төмендейді.

Министрліктің дерегі бойынша, сұрыптаушылар, ораушылар, шатыр жабушылар мен сылақшылар сияқты кәсіп түрлеріне сұраныс азайып, түбінде олар еңбек нарығынан жоғалады. Бұл өзгерістер технологияның дамуына және ақылды роботтардың адам күшін алмастыруына байланысты. Сонымен қатар құрылыс қызметкерлері, монтаждаушылар, бульдозер машинистері және сепараторлар да маңыздылығын жоғалтуы мүмкін.

Астана қалалық технологиялық колледжінің директоры Ләззат Разбекова бұл мамандықтарға сұраныстың азаюын заңды құбылыс деп санайды. Оның айтуынша, жасанды интеллект пен технологияның дамыған заманында мұндай жұмыстарды роботтар алмастырып жатыр. Сондықтан мамандарды жаңа талаптарға сай қайта даярлау қажет.

Сонымен қатар министрлік кей мамандықтарға сұраныстың артқанын да атап өтті. Ғылым және жоғары білім министрі Саясат Нұрбектің айтуынша, соңғы үш жылда талапкерлердің 60 пайыздан астамы инженерлік, ақпараттық технологиялық, педагогикалық және жаратылыстану бағытындағы мамандықтарды таңдаған.

«Қазіргі талапкерлердің 17%-ы физика-математика, 17%-ы химия-биология, ал 10%-ы информатика пәндерін таңдап отыр. Яғни 45%-ы инженерлік-технологиялық және ақпараттық технологиялық мамандықтарды меңгеруге ниетті», – деді Саясат Нұрбек.

Елімізде кейбір мамандықтар жойылғанымен, кадр тапшылығы мәселесі әлі өзекті болып отыр. Қазақстанда 93 мың есепші, 77 мың күзетші мен инкассатор, 33 мың медицина қызметкері, 32 мың тәрбиеші және 31 мың жаратылыстану пәнінің мұғалімі қажет. Сонымен қатар бастауыш сынып мұғалімдері мен сатушыларға да сұраныс жоғары.