Бірыңғай QR жүйесі: қазақстандықтар үшін не өзгереді

Қазақстанда 19 шілдеден бастап банкаралық бірыңғай QR төлем жүйесі толық іске қосылады. Барлық екінші деңгейлі банк телефон нөмірі арқылы ақша аудару және QR-кодпен төлеу жүйесіне қосылды, деп мәлімдеді Ұлттық банк төрағасының орынбасары Бинұр Жәленов.

Ұлттық банк бірыңғай жүйені кезең-кезеңімен кеңейту 7 шілдеде басталғанын мәлімдеді.

Жаңа жүйе арқылы қазақстандықтар өз банкінің қолданбасын пайдаланып, басқа банктің QR-коды арқылы тауарлар мен қызметтердің ақысын төлей алады. Сондай-ақ өзге банктің клиентіне телефон нөмірі бойынша ақша аударуға мүмкіндік беріледі. Төлемдер тәулік бойы бірден жүргізіледі.

«Банк қолданбасын ашып, QR бөлімін таңдап, кез келген төлем құрылғысы арқылы есеп айырысасыз. Тұтынушы үшін ештеңе өзгермейді. Кәсіпкерлерге қосымша қолданба жүктеудің немесе жаңа құрылғы орнатудың қажеті жоқ», – деді Бинұр Жәленов.

Жүйе банктердің қолданыстағы төлем құрылғылары мен қолданбалары арқылы жұмыс істейді. Алайда кейбір банктің қолданбасын жаңарту қажет болуы мүмкін. Банктер 17 шілдеден бастап клиенттеріне бірыңғай QR жүйесін пайдалану тәртібін түсіндіреді.

Бірыңғай жүйенің мақсаты – әр банктің жеке QR желісіне тәуелділікті азайтып, банкаралық төлем мен ақша аударуды жеңілдету. Бұған дейін банктің QR-кодын көбіне сол банктің қолданбасы арқылы ғана оқу мүмкін еді.