Бір жылда Қазақстанға емделу мақсатымен 80 мыңға жуық шетелдік азамат келген

Қазақстанның емдеу мекемелеріне сырттан келетін шетелдік пациенттердің ағыны айтарлықтай артып, 2025 жылдың қорытындысы бойынша 80 мың адамға жетті. Осы жоғары сұранысқа байланысты ҚР Денсаулық сақтау министрлігі мен ҚР Туризм және спорт министрлігі бірлесіп, медициналық туризмді дамытудың 2026–2028 жылдарға арналған арнайы «Жол картасын» әзірлеуде.

Туризм министрлігінің баспасөз қызметі хабарлағандай, бүгінгі таңда еліміздегі он жетекші медициналық ұйым халықаралық JCI (Joint Commission International) аккредитациясына ие. Бұл - әлемдік денсаулық сақтау жүйесіндегі ең беделді әрі жоғары сапа стандарттарының бірі болып табылады.

Жаңа стратегиялық құжат шетелдік нарықтарда қазақстандық медициналық қызметтерді ілгерілетуді, салалық инфрақұрылымды жақсартуды, сервис сапасын арттыруды және халықаралық ынтымақтастықты кеңейтуді көздейтін кешенді шараларды қамтиды.

Ведомство мамандарының болжамы бойынша, бұл бағытты жүйелі дамыту медициналық қызметтер экспортын арттырып қана қоймай, салаға қосымша инвестициялар тартуға, жаңа жұмыс орындарын ашуға және Қазақстанның халықаралық имиджін одан әрі нығайтуға мүмкіндік береді.

Еске сала кетейік, бұған дейін Мемлекет басшысы Қасым-Жомарт Тоқаев Денсаулық сақтау министрлігіне көршілес мемлекеттермен келісімшарттар әзірлеуді және елімізде халықаралық ынтымақтастықты, тәжірибе алмасу мен озық медициналық технологиялар трансфертін белсенді дамытуды тапсырған болатын.